Cyber monsters

Sunodsunod ang dakop karon sa mga tawo nga nagpost sa social media kalabot sa hulga batok ni Presidente Rodrigo Duterte.

Una didto sa Luzon diin usa ka maestro nga nagtanyag og 50 million pesos kinsa ang makapatay sa pangulo.

Giangkon niya nga nadala lang sita sa emotion maong nahimo niya ang bahad batok ni PRD, dihang nadakpan nagluhod luhod pagpangayo og pasaylo.

Uwahi na ang tanan kay maproblema man gyud siya sa kaso nga iyang atubangon apil na ang inciting to sedition.

Samtang dinni sa Sugbo naa usay mga tawo nga nadakpan, una ang 26 anyos nga babaye sa baranggay Ibabao lungsod sa Cordova nga nagtanyag pud og 75 million pesos sa makapatay sa pangulo.

Apan alibi sa babaye nga gigamit ang iyang facebook profile sa iyang live-in partner nga iyang gibuwagan.

Posibleng nanimalos ang lalaki batok kaniya maong gihimo ang post sa facebook ug siya na hinoon karon ang nadakpan.

Kun tinuod man ang iyang giingon, leksyon usab niya nga angayan kat-onan nga wala unta niya ihatag ang iyang password sa lalaki aron segurado nga dili siya masugamak.

Pero ang mga otoridad dunay kapasidad sa pagutingkay sa tinuod gamit ang mga kahimaman sa anti-cybercrime unit.

Sa wala pa himoa ang operasyon dunay proseso nga ilang gihimo isip basehan sa pagsikop sa mga malambigit sa krimen.

Samtang usa ka security guard ug duha ka barangay tanod ang nitahan sa NBI7 human kuno dunay naggamit sa ilang identity aron dauton sila.

Kumon nga alibi nga dali rang bukingon sa mga otoridad busa kun nagsulti sila sa tinuod wala silay angayan kabalak-an apan kun namakak, aw sigurado silang masilotan.

Sa kalibutan karon nga nakatutok sa social media daghan kaayo ang mga keyboard monsters nga modaut sa isig ka tawo.

Wala na gyud nila alang alanga ang labing gamhanan pa gyud sa nasod ang ilang gihilabtan.

Karon masampolan na gyud sila sa ngipon sa balaod kay ipaagi man kini sa korte diin mahimo nilang depensahan ang ilang kaugalingon.

Kung tinood man nga inosente ang uban ug gigamit lang ang ilang identity, unta madakpan ang naa sa likod niini aron mataral sa hukmanan ang tinood nga cyber criminal.