Ang esena nilang Anakin, Padme ug Palpatine

Sa tinguha nga mamahimong hingpit nga Jedi Master, si Anakin Skywalker nahimong agresibo nga tungod niini mas nisalig siya kang Palpatine ang nagpahiping Lord Sith. Gipasaligan siya niini nga kun moanib siya niya mapanalipdan niya ang iyang hinigugma nga si Padme Amidala. Tuod man tungod sa maong bakak nahimong gitalikdan ni Anakin ang namat-an niya og buot nga kinabuhi ug sa mas dali nga paagi nakig-alayon sa pwersa sa kangitngit.

Giadto ni Padme ang iyang hinigugma nga si Anakin ug gibadlong kini nga di maayong makigharong kang Obi Wan Kenobi iyang magtutudlo. Apan nagmagahi si Anakin ug ang sakit mao nga tungod sa iyang naghinobrang kasuko imbis maluwas si Padme nakalas naman nuon ang kinabuhi niini. Mao usab kini ang gipatuo kaniya ni Palpatine sa dihang nahigmata si Anakin human siya ka operahi niadtong nahimo na siyang Darth Vader.

Daghanan nato ang nihimo og pagdesisyon sibo sa atong pagbati ug sa atong emosyon. Kining maong desisyon maoy nakadaut nato sa makadaghan ug nakapildi sa atong kalag. Ang emosyon mao man ang nipukan sa mga dagkong tawo sa mga karaang sibilisasyon. Ang naghinobrang gugma mahimong mantsa sa atong tunhay nga panaw padulong sa kalampusan.

Dili lang mahitungod sa kalampusan kondili tungod usab sa gitinguhang kalinaw. Kalinaw nga di mahimong ihatag sa gubot pa sa lukot nga kalibutan. Husto gyud ang pagtulon-an sa Budhismo nga naglambigit ning mosunod:

1. Anaa ang Pag-antos

2. Ang pag-antos dunay hinungdan.

3. Mahimong wad-on ang pag-antos

4. Ug ang bugtong paagi sa pagwala niini mao man ang pagpuyo sa kinabuhi sa balanse.

Daghan pa unta ako og isulti bahin niini apan ang maong tinguha nako sa pagsulti nakapadasig nako sa paghilom kay diha sa kahilom walay bisan kinsa nga masayod sa imong gihunahuna ug kun wala silay kasayuran kun unsay anaa sa imong hunahuna nan, mas dali alang nimo ang paghimo sa imong mga plano.

Ang mga Jedi nahimong dili kasarangan tungod kay gipaningkamotan nila nga mas mopatigbabaw ang ilang hunahuna kaysa ilang pagbati. Si Anakin napukan gumikan sa iyang naghinobrang gugma kang Padme.

Si Padme napukan tungod kay ang iyang gugma kang Anakin maoy nilaglag kanilang duha. Si Palpatine nalipay kay mao may iyang tumong nga malaglag ang Jedi. Si Obi Wan nagmahay kay bisan kun gipahimangnoan na siya ni Master Yoda nagdumili gihapon siya sa pagtuo kaniya, gipugos niya nga mamahimong Jedi ang bata nga mamahimong dakong kaaway sa pwersa. Ang bata nga magdala og kagubot sa uniberso sa mga adlaw nga moabot.