“Divide and rule strategy” ra gihapon
Adunay giproponer nga balaodnon si Surigao del Norte Representative Robert Ace Barbers nga maglimit sa lumolupyo sa mga urban barangays ngadto sa 15,000 lamang ka tawo sa tuyo nga mapadali ang paghatud sa mga batakang serbisyo ngadto sa katawhan. “Bungkagon aron sayon dumalahon” – mao kini ang epektibo nga pamaagi aron madominar sa mga politiko ang katawhan. Dayan-dayan lang ang katuyoan nga madali paghatud ang serbisyo sa katawhan. Pamolitika lang gihapon ang tinuod nga hinungdan niining tanan. Pastilan Mayor!
Midaghan ang tapolan
Namahayag si COVID-19 Shield Commander Police Lieutenant General Guillermo Eleazar nga ang mikunhod ang gidaghanon sa krimen atol sa pagpatuman sa ECQ. Midason si Gen. Eleazar nga angayan usab nga mahiapil na ang curfew sa bag-ong normal pagbatok sa COVID pandemic. Ang ayuda nakaalibyo sa kalisod sa katawhan nga maoy sagad hinungdan sa krimen. Ang presensya sa kapolisan nakapaislag usab sa mga badlongon. Nakuhaan tingale ang mga badlongon, apan basin midaghan usab ang mga tapolan kay nagsalig na lang sa ayuda sa kagamhanan. Faeetz!
Salin nga di mapan-os
Gibana-bana nga dugang 15,000 pa ka beneficiary ang makadawat og financial assistance sa siyudad sa Mandaue human masayran nga adunay sobra o “salin” nga kwarta gikan sa Social Amelioration Program tungod sa kapakyas sa ubang beneficiary pagkobra sa ilang hinabang. Mao kini ang matang sa “salin” nga dili gayod balibaran sa katawhan. Sukwahi sa pagkaon, dili man gayod mapan-os ang maong “salin”. Hinonoa, magkalami ang maong hinabang alang sa palaran nga beneficiary nga mahatagan. Hala, linya na dayon!
Dili paalkansi ang intsik
Ang kagamhanan sa Tsina modili na sa pagpangopya sa mga langyaw nga desinyo sa mga bag-ong publikong pasilidad aron mapatigbabaw na ang mga desinyong lokal nga magpadayag sa ilang kaugalingon’g kultura. Walay pamahayag ang Tsina kon undangon ba usab nila ang pagpangopya sa mga produkto sa ubang nasod. Wala na unya’y makita nga mga langyaw nga architecture sa Tsina sa umaabot, apan magbaha lang gihapon ang mga kinopya nga produkto nga ginama sa China nga ilang idam-ok sa ubang nasod. Dili gayod magpa-alkansi ang Intsik. Saoonz!
‘Iho’ mitabang pagpatuman sa ECQ
Gikataho nga usa ka surfer nabiktima sa pag-ataki sa “iho” kon “pating” samtang naligo didto sa San Dollar Beach sa Santa Cruz, California. Gilimitahan man unta ang oras sa paggamit sa maong baybayon tungod sa COVID-19. Ni’ng higayona, aduna na’y dugang rason nga masirad-an ang maong kabaybayonan. Ang kagahi ug ulo sa tawo mao gayod ang sagad hinungdan sa iyang kaalaotan. Kay wala man maminaw sa kapolisan, mitabang na ang mga iho/pating pagbadlong aron mapuyo sa balay ang katawhan. Hala no!
- Latest