Kalinaw ning panahon sa COVID

Binasi: Juan 14; 27-31

Lisud ning kab-oton kay daghan nato gubot dili lang ang atong palibot kondili hasta ang atong tagsatagsa ka kaugalingon. Gubot ang atong kaugalingon tungod kay nahimong naputos kita sa mga kabalaka gumikan ning maong kahimtang nato karon. Ang kasinatian sa isolation, kaguol ug ekonomikanhong kalisdanan ang mahimong sinugdanan sa pagsinati sa mental health crisis.

Matud pa sa studies didto sa New York dunay mga 75,000 ka mga tawo ang mangamatay gumikan sa paghikog. Mamahimong desperado ang kadaghanan gumikan ning maong coronavirus. Sa akong yanong pagsabot ato kining hagpaton:

1. Ang Isolation. Mao man ang nakapahimo sa usa ka tawo nga maburyong ug maglagot gumikan ning hitaboa karon. Naandan nato nga anaa kita sa gawas, mosuroy ug maglingawlingaw. Dugang pa ang pag-urong sa usa ka dapit maoy makapahimo natong problemado. Homo socialis kita nga sa ato pa ang atong kahingpitan ingon nga tawo anaa diha sa pakiglambigit sa usa’g usa.

Kun wala ang kalambigitan, unsaon man nato paghatag og bili og kahulogan sa atong pagkatawo? No Man is an Island matud pa.

2. Ang ekonomikanhong kalisdanan maoy hinungdan nga nahimong paralisado ang tanan. Dunay mga tawo nga buot mokontrol sa atong kinabuhi. Mga tawo nga hakog sa gahum. Mga tawo nga buot mo-manipulate sa kadaghanan kanato. Mga tawo nga buot mamahimong ginoo bisan pa man kun sila mismo dunay kinutoban.

Kining tanan maoy makapahugno sa kinatibuk-an sa atong pagkatawo.  Ang maong pagkahugno moresulta sa kawalay gana nga mabuhi pa ug maghatag og kinabuhi alang sa uban.

Unta kining maong panagna nga sibo sa kasamtangang mga hitabo dili unta matinuod kay unsaon na lang nato ang kinabuhi kun ugaling nahimo kining disposable o ato na lang i-dispose aron sa ingon mahunong na ang pag-antos. Unta dili kini mahitabo. Dili ug dili lang gyud unta.

Ang akong pag-ampo nga unta kita magpabiling lig-on taliwala ning pintas nga kasinatian. Kay kining maong pintas nga kahimtang basin mas pilion sa kadaghanan ang pintas nga pagkinabuhi aron lamang mabuhi.