Paggakos sa bag-ong teknolohiya
Usa sa nakahimo sa DYAB Abante Pa, Bisaya! nga lahi sa ubang mga sibyaanan mao ang kaandam sa paghangop sa bag-ong mga teknolohiya sa komunikasyon ug ang kamapangahason sa pag-awhag sa mga tigpaminaw sa pagsuway sa bag-ong mga paagi sa pagsibya, pagpadayag sa ilang baruganan, sugyot, komentaryo ug pakitabang.
Naamguhan ni nako pag-usab dihang nipahinumdom ang among kauban nga si RC Dalaguit de Vela nga ika-25 nang tuig sa among pagsibya sunod buwan. Kana kon tugotan sa gobyerno nga malab-as ang among prangkisa.
* * *
Ang DYAB maoy labing una nga nisagop sa text messaging isip paagi sa pagtampo sa mga tigpaminaw sa mga tulomanon.
Dihang ang landline ug suwat pay naandang kahimanan sa komunikasyon, gidapit namong mga tigpaminaw sa pagpada og text messages pinaagi sa pagpahibawo sa among mga numero sa telepono sa kahanginanan.
Human sa pasiunang panagana, nagbaha ang text messages nga nga kuwangon pang panahon sa mga tulomanon kon basahon ang tanang text. Dihang nisunod nang ubang mga sibyaanan, nangita na sab mi og bag-ong mga teknolohiya nga makapalambo sa pagsibya.
* * *
Ang DYAB sab maoy labing una nga nisuway og live streaming pinaagi sa libreng plataporma sa Skype, ang SkypeCast.
Wa ming kaandam sa dakong kausaban—sa usa lang ka pamilok, ang among sibya nga maglisod og lusot sa habog nga kabukiran sa amihanan ug kasadpang Sugbo nabati na sa tumang katin-aw sa tanang suok sa kalibotan.
Dihang gihunong ang SkypeCast, gisuwayan namo ang Yahoo! Live, Stickam, YouTube ug Facebook Live. Ug ang mga tigpaminaw mapailubon ug mahinangpon nga ninunot sa tanang kausaban.
* * *
Tungod sa panginahanglan pagsibya gikan sa mga pinuy-anan tungod sa lockdown, nisuway mi sa Zoom ug natagbaw sa kalidad sa audio ug video.
Pagpawong sa National Telecommunications Commission (NTC) sa DYAB ug tanang sibyaanan sa ABS-CBN, nahimong mas mapuslanon ang Zoom.
Dihang si Atty. Ina Magpale, nga maoy nigiya namo unsaon pagsumpay sa Zoom ug FB Live, nihatag sa link sa among Zoom meeting ngadto sa mga tigpaminaw, kinsa wa mag-usik og higayon sa pagsuway, nakahinumdom ko sa kalalim sa among gibati dihang nagpaka-paka ang text messages ug chat messages sa mga Sugbuanon sa nagkalainlaing kanasuran pila ka dekada nang nilabay.
* * *
- Latest
