EDITORYAL - Mass testing tungason kaayo

Tungason kaayo para sa lokal nga kagamhanan sa Cebu City, Mandaue City ug Lapu-Lapu City kining tinguha nilang magpahigayon og mass testing gamit ang rapid test tungod sa kabalaka sa publiko.

Makita kini sa turnout sa unang adlaw sa pagpahigayon niini sa tulo ka siyudad niadtong nakalabay nga adlaw’ng Miyerkules. Dunay uban nga mikooperar apan duna say uban nga wala.

Bisan gani kadtong mitunga gyud sa testing area nga nipirma wala gihapon modayon pagpakuha og dugo.

Sa Cebu City nga maoy nag-una karon sa dunay kinadaghanan og kaso, nakahimo lang sila og 195 ka mga test sa tulo ka mga barangay sa Basak San Nicolas, Inayawan ug Basak Pardo.

Target unta sa extraction teams nga makakuha didto og dos mil ka specimen apan mao ra gyud to ang nitungha.

Hinuon, si Mayor Edgardo Labella nipasabot nga dili kini pinugsanay ug boluntaryo lang kini.

Arang-arang nalang sa Mandaue tungod kay naabot og 886 gikan sa target nga 1,657 ka residente gikan sa lima ka barangay ang ilaha untang target.

Dili mabasol ang publiko kun nganong ingon niini ang ilang pagtagad sa mass testing.

Kay sa nakalabay nga mga adlaw, dunay mga nanggawas nga post sa social media nga nagkwestyon unsa ka “sanitized o sterilized” ang mga gloves sa mga extraction teams, duna nay mga nisugyot nga kinahanglang magilis sila og gloves kada human og kuha og specimen kay nahadlok silang napiskan kini sa lawas sa unang gikuhaan ug uban pa.

Apan bisan pa sa mga pasalig gikan sa gobiyerno nga limpyo ug nagsunod sa protocols ang mga frontliners, daghan gihapon ang nabalaka maong di sila magpaubos sa test.

Ang mass testing gipasiugdahan sa Office of the Presidential Assistant for the Visayas (OPAV) inabagan sa tulo ka siyudad isip pasiunang lakang sa Project Balik Buhay.

Gitinguha nga makita sa mass testing kun unsa kalapad ug gidaghanon ang nataptan sa coronavirus, ug pinaagi niini makahimo sila og desisyon o rekomendasyon aron matutokan ang pagpakgang sa pagkatap niini.