Submit sa rapid test

Sugdan ugmang adlawa ang rapid testing sa dakbayan sa Sugbo. Una kining gitakda niadtong Lunes dungan sa Lapu-Lapu ug Mandaue apan nausab tungod sa pipila ka mga concern nga angayang tubagon.

Ang rapid testing mao ang kamot sa Project Balik Buhay nga gipasiugdahan sa Office of the Presidential Assistant for the Visayas (OPAV) uban sa pagpakigtambayayong sa tulo ka local government units ug Department of Health.

Tumong sa rapid testing mao ang pag-ila sa mahimong basihanan sa transition gikan sa Enhanced Community Quarantine ngadto sa General Community Quarantine pinasikad sa calibrated, scientific ug evidence-based nga transition.

Ang rapid testing himuon sa dapit sa barangay nga sayon maobserbar ang social distancing ug dili sa balay, matud pa ni OPAV Assistant Secretary Jonji Gonzales.

Ang paagi sa paghimo sa rapid blood test ug dili swab test busa layo ang posibildad nga matakdan sa coronavirus ang maghimo sa test og ang gitestingan (gawas lang kun positibo na siyang daan) kay dugo man ang kuhaon ug dili plema nga naa ubos sa tutonlan. Libre ang rapid testing busa walay bayranan.

Ang rapid testing gihimo sa team nga gilangkoban sa team lider, tulo ka medical technologists, duha ka nurse ug mga Barangay Health Workers. Napulo ka porsiyento sa gidaghanon sa households sa tulo ka siyudad ang target nga testingan aron makuha ang scientific nga resulta. Ang dakbayan sa Sugbo nga may 80 ka barangay ug populasyon nga 1,012,803 nga gilangkoban sa 235,536 ka households nagkinahanglan og 23,554 ka mga tawo ang matestingan.

Ang Lapu-Lapu nga may 30 ka barangay og populasyon nga 501,323 nga gilangkoban sa 122,274 ka households nagkinahanglan og 12,227 ka mga tawo nga matestingan samtang ang Mandaue nga adunay 27 ka barangay ug populasyon nga 422,464 nga gilangkoban sa 99, 873 ka households nagkinahanglan usab og 9,987 ka mga tawo nga matestingan.

 Aron lig-on ug konkreto ang mahimong basihanan sa tulo ka gobyernong lokal sa ilang transition gikan ECQ ngadto sa GCQ, atong suportahan ang rapid test nga gipasiugdahan.