Ang mamumuo ug mamumuhonan

Tungod sa krisis mugna sa coronavirus COVID-19 halos tanan mamumuo ug mga agalon nitiyabaw apan mas grabe ang kahimtang sa sanglit wala man gyuy kakuhaan ipalit og pagkaon kay no work no pay man.

Mao na siguro ni ang labing pait nga Labor Day celebration sa mga anak sa singot kay wala may laing kapadulngan kay lagi naangol man ang ilang kompaniya pag igo sa coronavirus.

Kaniadto mahimo ra sila mag rally pagpadayag sa mga sentimiento apan karon nga covid ang hinungdan kinsa man ang ilang paninglan?

Ang mga kompaniya adunay mga balidong rason sa pag tak-op sa ilang operasyon ilabi na kadtong mga gagmay ug dili kaayo dagko nga kompaniya.

Adunay ayuda nga gitanyag sa gobierno sama sa DOLE apan murag dili tanan maaporan, depende sad kon unsa ka abtik ang mga kompaniya mo-follow up sa cash subsidy ngadto sa DOLE.

Mao ra gyud unta kini ang makatabang tabang mga kawani nga nakulban sa kaldero, maayo lang kadtong nakadawat na kay dunay ikatak-ang sa kaldero apan kadtong nagpaabot makapangutkot gyud bisan walay katol sa ulo tungod kay wala naman siyay ikapakaonn sa iyang pamilya.

Ini’g-balik na sa bag-ong normal, ang pangutana duna pa bay balikan nga trabaho ang mga mamumuo?

Kung atong tan-awon dako usab kaayo og nawala sa mga mamumuhonan kinsa milukapa usab, makabangon pa kaha sila aron padayon sa paghatag og trabaho sa ilang mga kawani?

Mao ang sakit nga reyalidad nga karon pa lang pangandaman sa mga mamumuo ug mamuhonan nga parehong gi knockdown sa COVID-19.

Sige lang paglaum ang atong gihuptan aron makabangon ug magmadaugon sa boxing bato sa kagaw nga mikuyanap karon.