Misteryo sa North Korea

Sama sa ka-high profile sa balita sa grabe nga paghasi sa Coronavirus Disease o COVID-19 sa kalibotan ang giingong pagkamatay kuno sa batan-ong dictador sa North Korea nga si Kim Jong Un sa niaging mga adlaw.

Giingong namatay si Kim human kuno sa palpak nga operasyon sa iyang kasingkasing. Bisan sa iyang pangidaron mga 36 anyos, atong makita sa iyang mga hulagway nga adunay dakong problema siya sa iyang panglawas tungod sa iyang ka tambok gumikan usab iyang dili maayo nga lifestyle.

Apan ambot kun unsa ka tinuod ang giingong kamatayon ni Kim. Hinuon, basi usab sa mga opisyal sa South Korea, ang karibal sa North Korea, dakong buhi si Kim. Gani, basi kuno sa satellite imagery, walay kaguliyang didto sa North nga timailhan sa kamatayon ni Kim.

Tungod sa higpit nga pamunoan didto, lisod mahibaw-an sa outside world ang mga panghitabo didto sa North Korea. Bisan pa ang intelligence service sa Estados Unidos maglisod pagpangalap og mga taho gikan sa maong nasud.

Kun tinuod ba nga namatay ang diktador nga lider sa North Korea, agta ray nasayod. Hinuon, niining mga naulahing mga adlaw, wala nagpakita sa publiko si Kim, sukwahi sa naandan niyang tulomanon. Nagpasabot ba kaha kini nga siya adunay sersyoso nga balatian?

Apan kun tinuod ang balita mahitungod sa iyang kamatayon, dakong pangutana karon kun kinsa ang mosunod sa iyang trono. Hinuon matud pa sa mga political experts, ang iyang igsuon nga babaye nga si Kim Yo Jong ang posible nga mopuli kaniya.

Wala nay laing kadugo ni Kim Jong Un nga haum nga mopuli kaniya kondili ang iyang manghod nga babaye nga giingong 31 anyos. Gani anaa usahay sa iyang kiliran si Kim Yo Jong sa mga public appointment sa maong lider.

Apan posible usab nga motumaw unya ang seryosong problema sa higayon nga molingkod sa trono si Kim Yo Kong kun tinuod nga namatay gayud si Kim Jong Un. Usa siya ka batan-ong babaye ug dili kaha kini mgdala og dakong krisis sa politika sa maong nasud?

Hinuon, sa laing bahin, lisod usab nga hunahunaon ang usa ka North Korea nga dili Kim ang mamuno niini. Ang mga Kim kabahin na sa inadlaw nga panginabuhi sa mga North Koreans. Sukad sa pagkahimugso sa maong nasud, ila na nga giila nga sama sa Ginoo ang mga Kim.

Ang kalibotan nakatutok sa mga panghitabo karon sa North Korea. Kun adunay pagpuli sa liderato didto, dako kini og epekto, ilabina didto sa Korean Peninsula. Ug kun padayon usab ang liderato ni Kim Jong Un, padayon usab nga nagbitay ang kwestiyon sa sitwasyon sa iyang panglawas.