EDITORYAL - Silot sa makalapas sa ECQ

Dunay nagkalain-laing mga pamaagi nga gihimo ang nagkadaiyang mga local government units pagsilot niadtong mga nakalapas sa enhance community quarantine sa tagsatagsa nila ka mga hurisdiksyon, ang uban matawag nga silot gyud samtang ang uban para lang sila maleksyon.

Sa ubang mga lugar, sama didto sa Luzon, dunay mga siyudad ug kalungsoran nga mipahamtang og silot nga pagpamartsa kanila og pipila ka kilometro. Dunay uban mas paskin pa gyud sila mga “gahi og ulo,” usa ka silot nga maingon ta makapauwaw kanila.

Dunay uban nga gipatilaw gyud sila og prisohan sud sa pipila ka oras, dunay uban nga giparosaryo sila, community service. Dinhi sa Cebu City, kun madakpan ang taw okay nakalapas sa ECQ, pasayawon sila og Sinulog, community service ug parosaryuhon.

Ang mga seniors ug mga menor de edad di pasayawon ug dili silotan og community service apan parosaryohon sila ug kuhaan sa ilang mga pangalan ug address dayon papaulion.

Kasagaran sa mga silot pinasubay hinuon sa balaod, apan kanang pagpamartsa ug pagbutang og paskin, may mga mikwestyon kay lagi nakalapas na kuno sa ilang tawhanong katungod.  Tingali, apan mao ra sad ang nahunahunaan dayon sa mga lokal nga opisyal ilabi na tungod sa kadaghan sa ilang mga nadakpan.

Mas maayo nalang ni kun itandi sa pagpriso kanila sud sa pipila ka oras unya ma-expose na hinuon sila sa ubang mga priso, o ba kaha sila maoy magdala sa coronavirus diha sa mga prisohan.

Apan dili ba ang ilang wala pagtuman sa ECQ, paglapas man sab sa katungod sa uban nga naningkamot pagpundo sa ilang mga balay aron maproteksyonan gikan sa maong makatakod nga sakit?

Depende nalang tingali kun unsaon pagsabot sa publiko ang matang sa silot nga gipahamtang niadtong mga malapason.

Apan diay mas maayong sugot para sa LGUs, mas maayong ang silot nga ipahamtang mao ang pagpatanom kanila og mga lagutmon o mga kahoy diha sa kabukiran.

Gawas nga makatabang sila sa supply sa pagkaon ug makapalabong sa kalasangan, may leksyon sab silang makat-onan pagpananom.