Tuo-tuo sa COVID

Dili ikalimod nga ang Coronavirus Disease o COVID-19 maoy labing ngilngig nga katalagman nga mihapak sa kalibotan human sa Spanish Influenza nga mipatay og 50 milyones ngadto sa 100 milyones human ang World War 1.

Apan dili sama sa Spanish Influenza nga nagsugod didto sa Europa ug mikatap sa kalibotan pinaagi sa mga barko nga gisakyan sa mga Amerikanhong sundalo 100 ka tuig na ang milabay, adunay mikwestiyon sa tinubdan sa COVID-19.

Viral karon sa social media ang mga report nga dili kuno gikan sa mananap ang makamatay nga coronavirus kondili gikan kuno kini sa laboratoryo, giimbento didto sa Tsina isip usa ka biological nga armas.

Ambot asa gikan ang maong taho. Hinuon daghan usab ang mituo niini. Hinuon, sa akong pag-research mahitungod niini, wala ko ka kaplag og katuohan nga article pagmatuod nga usa ka biological weapon kining maong klase sa coronavirus.

Hinuon sigun pa sa mga health experts sa kalibotan, imposible nga usa ka biological weapon ang maong klase sa coronavirus. Ug wala kunoy konkreto nga ebedinsiya nga giimbento kini gikan sa laboratory didto sa China.

Adunay nanggawas usab nga mga taho kalabot sa nagkalainlaing tambal batok sa COVID-19. Matud pa nga saging ra kuno pangontra sa maong virus. Mao nang sa nakalabay nga mga semana, sayong nahurot ang saging sa kamerkadohan kay gipangompra sa uban.

Sa laing bahin, ang pagtuob og init tubig nga gibutangan og asin ug uban pa epektibo kuno batok sa coronavirus. Adunay mga video nga mikatap sa social media niini. Ambot kun napamatud-an na ba kaha kini sa mga ekperto.

Gani adunay mga komersiyal sa radio ug telivision nga nagdasig sa katawhan pagtumar og kapsula nga herbal kay maayo kuno kini nga pangontra batok COVID-19. Ug maayo tuod kini nga PR niining panahon sa kalibotanong pandemic.

Kining tanan wala pa gayud maprobahi sa hingtungdang ahensiya nga epektibo batok sa makalilisang nga coronavirus. Angay natong hinumdoman nga wala pay tambal ug bakuna ang naimbento batok sa COVID-19.

Busa dili kita angay nga motuo dayon sa mga anunsiyo nga dili kunpirmado, ilabina sa dili katuohan ug kwestiyonable nga tinubdan. Kay basin unya kun masunog na hinuon kita dili oras tungod sa peke nga inpormasyon.