Duha ka adlaw maka pangompra

Mopatuman na ang kagamhanan sa dakbayan sa Sugbo og sistema sa pagpatuman sa social distancing diha sa Carbon Public Market sa tibuok panahon sa ECQ. Ang pagpangompra karon sa Carbon adunay gitakda’ng adlaw segun sa nag-unang letra sa apelyido.  Matud pa sa akong mga higala, maayo unta kon ang unang letra lang sa pangalan ang basehan kay aron duha ka adlaw sila nga makapangompra. Kini tungod kay gawas sa ilang tinuod nga ngalan, tawgon man usab sila’g ATTORNEY/ENGINEER, busa mahimo pud kuno silang mangompra sa adlaw nga gitugot mangompra ang letra nga “A” ug “E”.  Madahaaan!

Naluwas sa COVID, naluya sa bayronon

Dako’ng suliran karon sa mga pasyente nga nataptan sa coronavirus tungod sa kadako sa bayronon nga ilang sagubangon.  Gani adunay gikataho, matud pa, nga adunay bill sa usa ka pasyente nga mikabat ngadto sa P3 milyones sulod lamang sa 16 ka adlaw nga pagka-confine sa hospital.  Maayo ka na lage unta sa imong sakit apan daw hunusan ka pag-usab sa imong kinabuhi inig tan-aw nimo sa imong bill sa hospital.  Matud pa sa pagya, “Maypa Matay”. Saoonz!

Dawaton aron di kalagon

Mipalabang ang kagamhanan sa dakbayan sa Quezon og usa ka ordinansa nga magpahamtang og silot ngadto sa mga punerarya nga mobalibad sa pagdawat sa mga patay nga lawas nga biktima sa COVID-19 nga balatian gumikan lamang sa kahadlok nga matakdan o sa bisan sa unsang dili makatarunganon nga rason.  Multa ug priso lang hinoon ang ipahamtang nga silot sa mosupak; wala maapil ang silot nga hamokon ang taga-punerarya sa kalag sa namatay.  Hasola!

Way ‘blema kay amigo sa tiglista

Mimando si Presidente Duterte ngadto sa DILG sa paghimo og imbestigasyon sa taho nga dunay mga residente nga nagsugal ug nag-inom human makadawat sa ilang hinabang nga kwarta gikan sa gobyerno.  Kadtong mapamatud-an nga misupak sa lagda sa ECQ, mahimong kawad-an sa ilang hinabang.  Wala mahadlok ni’ng maong kamanduan ang ubang mga residente kay lage nagsalig man sila nga suod nila’ng higala ang tig-lista kon kinsay makadawat.  Safe ra kuno gihapon. Hala no!

Makaburyong na ang ECQ

Sama sa ubang Pilipino, miangkon si Presidente Duterte nga gibati na usab niya ang kasakit ug kahingawa sa kahimtang sa tawo nga mapaubos sa lagda sa ECQ nga daw way kalainan sa usa ka binilanggo.  Bisan sa kadaghan sa tawo ug mga opisyales nga nagpalibot ug nakahinabi sa Pangulo, gibati gihapon niya ang pagka-buryong nga hatud sa ECQ.  Ang wala niya masinati, mao lamang tingale ang kagutom o dili ba kaha ang kabidli sa ginhawaan sa pagpunay og kaon sa sardinas nga rasyon sa kagamhanan.  Kana kon naa pay nahibilin. Faeetz!