Panahon na'ng seryosohon

Tulo na ka semana sukad gipaubos sa enhanced community quarantine ang dakbayan sa Sugbo ug ang tibuok lalawigan.

Sulod sa maong gidugayon limitado ang paglihoklihok sa kadaghanan nga maoy tumong sa ECQ.

Nag-unang katuyoan niini aron malikayan ang pagkatap sa kagaw sa COVID-19.

Apan sa niaging tulo ka semana atong naobserbahan ang kagahi sa ulo sa uban ug ang kakuwang sa disiplina.

Daghan ang wala moseryoso sa ECQ ug mibaliwa sa pasidaan sa mga opisyal sa gobyerno.

Timailhan niini mao ang gidaghanon sa mga nadakpan sa kapolisan nga mga mapalapason sa lagda.

Daghan pa gihapon ang wala makasabot sa seryoso nga hulga sa COVID-19 dili lang sa panglawas kun dili lakip na sa atong panginabuhi.

Kun padayon nga magpabadlong ang uban ug dili mosunod sa lagda posibling malugwayan pa ang ECQ. Ug magpadayon ang sitwasyon, pabiling way trabaho ug income ang kadaghanan.

Ang labing makalilisang og mataptan ka sa sakit tungod kay kuwang ang atong mga pasilidad.

Gani sa wala pa ang COVID-19 pandemic daan na nga nagreklamo ang mga tambalanan ka kuwang og mga health workers.

Panahon na nga atong seryosohon ang pagsunod sa ECQ tungod kay wa ta masayod kinsa na ang nagdala sa makamatay nga kagaw.

Sa miaging Martes pito ang namatud-ang positibo sa COVID-19. Ang unom nila dinhi sa dakbayan sa Sugbo--lima sa Barrio Luz ug usa sa Labangon-- samtang laing usa sa dakbayan sa Lapu-Lapu.

Sila pulos wala magpakita og timailhan sa sakit. Kun dili pa tungod sa contact tracing dili gyud mahibaw-an nga duna na silay sakit.

Karon ang pangutana pila man kaha kabuok ang nahimamat nila sa wala pa sila mahibaw-i nga positibo?

Kadtong ilang mga posibling natakdan, posible sab to nga manakod pa og mapilo-pilo sa makadaghan. Ang resulta dili gyud mahuman ang ECQ.

Ug way laing alkansi kun magpadayon ning maong kahimtang kon dili ang mga kabus ug ang mga mamumuo nga nagsalig sa ilang trabaho.

Busa hunahunaa sa makadaghan sa dili ka pa mogawas sa inyong panimay ug maglaroy-laroy.