EDITORYAL - Boluntaryong lockdown

Usa ka maayong senyales kining inisyatibang gihimo sa pipila ka mga sitio sa Dakbayan sa Sugbo kalabot niining pagseryuso sa enhanced community quarantine sa siyudad nunot sa padayong pagdaghan sa mga kaso sa natakboyan sa novel coronavirus (COVID-19).

Ning bag-ohay lang, dunay mga sitio ug komunidad ang boluntaryong nagpatuman og lockdown pinaagi sa pagbutang og mga barikada ug magbalantay sa tanang sudlanan ug gawsanan sa ilang dapit ug gidid-an ang di taga ila makasulod.

Ang siyudad mimando sa pag-lockdown sa Sitio Zapatera nunot sa duha ka residente nila nga nagpositibo sa COVID-19.  Maayo kini para sa tibuok barangay ug mas labing maayo kun mosunod sab ang uban.

Sa Barangay Hipodromo, dunay usa ka komunidad nga sakop sa Sitio Saint Jude nga gitawag og “Libas” bisan walay nagpositibo, o na-expose sa ilang 65 ka pamilyang molupyo sa adunay COVID-19, nag lockdown na sila sa ilang kaugalingon.

Dili kini lisud para kanila tungod kay sila mismo sa ilang komunidad nakasabot kun unsa ka seryuso ang pagtakod –takod sa maong sakit. Ingon niana usab unta maghunahuna ang uban sa tibuok siyudad.

Apan subo lang nga bisan kadtong dunay mga quarantine passes, gigamit gihapon kini sa dili hustong pamaagi pinaagi sa pagsuroy-suroy ug pagpanumbalay bisan dili importanteng tumong.

Gani nabantayan sa kadalanan sa Dakbayan sa Sugbo nga nidaghan na sab ang mga nanggawas nga mga pribadong mga sakyanan ug mga motorsiklo, dako kaayo’g kalainan sa pagsugod palang sa ECQ sa miaging buwan.

Silang tanan adunay mga rason, maayo lang gyud unta kun ang ilang paggawas sa balay importante gyud ang tumong ug dili lang paglaroy-laroy.

Sa Danao City, gipatuman nila ang odd-even scheme sa control number sa ECQ passes kay nakabantay ang mga opisyal nga bisan pipila lang ang ECQ passes nga ilang gihatag daghan gihapon kaayo ang mga tawo sa gawas ug nakompromiso ang social distancing.

Tingali gikinahanglan na sab kini ipatuman sa Cebu City ug sa uban pang mga dapit aron masiguro ang social distancing.