Lisod alang-alangon

Nakadesisyon si Presidente Rodrigo Duterte nga lugwayan pa ngadto sa katapusang adlaw sa Abril ang Enhanced Community Quarantine (ECQ) nga kasamtangang gipatuman didto sa Metro Manila ug kinatibuk-an nga Luzon.

Kini gumikan usab sa nagsaka nga mga kaso sa Coronavirus Disease o COVID-19 sa nasud. Basi sa record sa Department of Health, ang Metro Manila ug Luzon maoy adunay labing daghan nga kaso sa makamatay nga sakit.

Dili ikalimod nga adunay misupak sa desisyon sa presidente. Adunay mga ordinaryong trabahante ang miingon nga padayon ang ilang kalbaryo tungod kay dili pa sila kabalik sa ilang trabaho. Kini kung aduna pay trabaho nga nagpaabot kanila.

Kabahin sa sektor sa patigayon, nagpasabot kining extension sa lockdown sa Metro Manila ug Luzon og dugang alkanse sa ilang mga negosyo. Adunay mga negosyo ang mihunong na gani sa ilang operasyon tungod sa kadako na ilang lugi.

Apan maayo ang desisyon ni Duterte pag-extend sa lockdown sa kaulohan ngadto sa Abril 30. Kini tungod usab sa padayon nga pagsaka sa kaso sa COVID-19 didto bisan pa sa hugot nga quarantine nga gipatuman sa kagamhanan.

Gani wala pay sinyales nga nakontrolar na sa gobiyerno ang pagkatap sa maong Coronavirus Disease. Hinuon padayon pa kini nga miigo sa liboan ka katawhan sa nasud ug mipatay na gani sa subra sa 300 ka tawo.

Ang Metro Manila maoy epicenter sa COVID-19 sa Pilipinas. Ug tungod sa dakong populasyon niini, nagkinahanglan ang kagamhanan og mass testing aron pagsuta kun unsa ka lapad sa natakdan sa maong sakit.

Gani, morag sayo ra kaayo ang paglibkas sa lockdown karong Abril 30 sa kaulohan. Nunot niining padayong krisis, angay nga padayonon ang enhanced quarantine didto hangtud nga maklaro na gayud nga nakontrol na ang maong virus.

Sa akong tan-aw, hilaw pa kaayo kun libkason ni Duterte ang enhanced community quarantine karon hinapos sa Abril. Kay simbako kun mobalik na usab ang tinakdanay, dako na usab kini nga problema sa kagamhanan.

Lisod alang-alangon ang kumbati batok sa coronavirus nga miigo na sa halos duha ka milyon ug mipatay sa subra sa 120,000 ka tawo sa kalibotan. Nagkinahanglan kini og komprehensibo nga aksiyon kun gusto kita nga magmadaugon.