Ang pagluwas

Nagkalainlain ang paagi sa pagluwas sa tawo sa iyang kaugalingon aron makasugakod ug makalahotay sa kalisod nga iyang nasugatan ug natagamtaman sama nga adunay nagkalainlain usab nga paagi ang mga politiko pagluwas sa ilang kaugalingon nga politikanhong ugma sa mga panahon sa krisis ug kalamidad nga mihasmag sa ilang pamunoan sama sa coronavirus.

Makita nimo sa kahimtang sa tawo ang iyang paagi sa paglahotay sa kalisod.

Ang mga kabus makigpatay ug mopatay kun dili makadawat sa ayuda bisan pa man ang uban kanila nakakuha na. Dili man tanan pero ang uban kanila gusto nga modawat og kaduha o katulo kun dili mabantayan.

Bisan unsaon pagbadlong nga dili magdikit dili gyod motuman kay nahadlok nga mahutdan sa ayuda nga gidala. Nahadlok nga mahutdan sa ayuda, wala mahadlok nga matakdan sa coronavirus mga makamatay.

Ang mga dato miapil pod sa pagpangayo sa ayuda. Nagyawyaw nganong wala maapil. Misumbong sa 888 ug sa Department of Interior and Local Government (DILG). Kining tanan atong nakita dihang gipangapod-apod sa barangay ang ayuda nga gihatag sa siyudad sa Sugbo ngadto sa mga tawo.

Ang nasudnong kagamhanan miluwas pod sa ilang kaugalingon pinaagi sa paglingla. Gipatuo niini ang mga tawo nga ang tanan makadawat sa ayuda nga ihatag bisan sila nasayod nga dili gayod tanan ang makadawat.

Giduot ni Presidente Duterte ug ni House Speaker Allan Peter Cayetano ang pangulo sa mga lokal nga kagamhanan lukop nasud sa ilang panghambog nga ang tanan makadawat sa ayuda bisan ang ilang pahatagan pinasikad sa patakaran nga ilang gipakanaug kadto lamang pinakaubos ug labing naapektohan sa krisis.

Si Cebu City Mayor Edgardo Labella ug ang mga tawo nga nagpalibot kaniya miluwas usab sa ilang kaugalingon pinaagi sa pag ingon nga ang tanan makadawat bisan pa man sa kakuwang sa ayuda nga ilang gipahatag sa barangay. Gipasanginlan pa sa mayor ang mga opisyal sa barangay nga namolitika sa paghatag sa ayuda. Ang migawas nga dautan ang mga opisyal sa Barangay.

Ingon ani sila moluwas sa ilang kaugalingon.