Suberbiyo ang ubang Pinoy
Pinasikad sa rekomendasyon sa IATF, mimando na si Presidente Duterte nga lugwayan pa ang Enhanced Community Quarantine sa tibuok isla sa Luzon hangtod sa Abril 30, 2020. Nagpasabot kini nga kinahanglan patas-an pa ang pailob sa taga-Luzon. Wala pa’y susamang kamanduan alang sa Visayas ug Mindanao. Nagpasabot usab kini nga adunay bentaha ang pagka-isla-isla sa atong nasud kay dili dali mokuyanap ang corona virus. Apan kon akong amigo pasultihon, nagpasabot kuno kini nga mga suberbiyo ug gahi’g ulo ang taga-Luzon ikumparar sa taga-Visayas ug Mindanao. Nagtiaw ra tingale akong amigo. Hala no!
Diskarte gamit ang diyos
Gidakop sa kapolisan ang usa ka pastor didto sa Cagayan de Oro human kini mopahigayon ug relihiyosong kalihukan sa ilang simbahan nga gitambungan og gatusan ka mga miyembro bisan pa man sa balaod nga nagdili sa pagtapok-tapok. Sugô ba kaha sa tinuohan o nangiyawat lang nga makakwarta? Si pastor ra ang nasayod, apan lutaw kaayo nga tungod sa kalisod sa kahimtang dala sa COVID, mohimo na ang tawo sa bisan unsang diskarte, lakip na gani ang pag-gamit sa ngalan sa Diyos. Saoonz!
Nagkasinabot sa unang higayon
Sirado karon ang mga Katolikong simbahan ug daghang kalihukan atol sa kweresma ang dili mapahigayon. Sa laing bahin, gipasirad-an usab sa gobyerno ang mga balay pasugalan sama sa casino ug mga buwangan aron malikayan ang pagtapok-tapok. Dili malilong ang panagbangi sa simbahan ug sa gobyerno sa nagkadaiyang isyu, apan tungod sa COVID, sa unang higayon nagkasinabot na gayod ang duha ka habig. Komedya pa sa akong higala, “Nagkasinabot na gyud ang sakop sa Diyos ug sakop ni Satanas”. Atala lage!
Daghan sulti, daghan sayop
Kusganon nga giawhag ni Speaker Cayetano ang DWD nga magbutang og mga hotlines aron madugangan ang kapasidad sa maong ahensya sa pagtubag sa mga yangongo sa katawhan. Angayan pa nga tun-an ang maong mga sugyot. Basin makadugang lang sa kahasol ug makahimo hinoon ug kalibog ug kagubot. Nahitabo na kini sa dihang mipasidaan Cayetano sa mga barangay opisyal nga tanang kabanayan hatagan og forms alang sa pagdawat sa SAP nga hinabang. Daghan sulti, daghan sayop, matud pa sa atong katigulangan. Faeetz!
Nagduwa og tubig-tubig
Gipahinumduman sa DILG ang mga Mayor sa kalungsoran nga likayan ang pagpahamtang og silot ngadto sa mga minor nga madakpan kay nakalapas sa curfew atol sa enhanced community quarantine. Kon mao kana, nganong giapil man ang mga minors sa balaod sa curfew. Ang mahitabo nga dakpon ra sila unya buhian ra usab. Mora ra diay ug nagduwa ang kapolisan og tubig-tubig ni’ng kalakiha. Pagkatoytoy!
- Latest