Ang anak dili makabalibad sa inahan

Bisan unsa ka buloyagon ang mga anak dili gyud mamahimong isalikway sa inahan kinsa adunay malumo nga kasingkasing nga andam manalipod ug mobuhis sa iyang kinabuhi tungod ug alang kanila.

Ingon niini ang akong inahan nga tua na sa kiliran sa atong Ginoo. Sa dihang naa pa siya diri sa among kiliran, ang iyang pagpangga ug pagmahal kanamo nga iyang mga anak dili gyud hitupngan.

Mahinumduman pa nako kaniadto dihang bata pa ako nga kon makasala gani ko ug bunalan sa akong amahan aron mapanton, ang akong inahan mao gyud ang manalipod kinsa moingon nga ayaw nalang intawon na dagmali ang atong anak.

Ang ingon niini nga sitwasyon akong gihimong sanglitanan sa gugma sa atong langitnong inahan nga Mahal nga Berhin sa

Guadalupe, ang inahan sa atong Manunubos nga Hesukristo.

Kining nasinati nato nga krisis sa coronavirus usa ka dakong pagpahimagmata nga mobalik kita sa atong Ginoo. Tungod sa ka daghan nga distraction karon sama sa paghatag og unang pagtagad sa mga material nga butang kay sa spiritual nga maoy hinungdan nga gipahiagum ang katawhan sa ingon niini nga sitwasyon.

Walay datu, walay kabus. Ang tanan patas niining panahona, walay kwarta o bisan unsa nga gamhanang armas ang makabuntog sa atong kontra nga dili makita kon dili ang atong hugot nga pag-ampo sa Labawng Makagagahum.

Niining panahona mosampit kita sa mahal nga Birhing Maria nga unta maoy mopatunga ug mohangyo sa iyang anak nga Hesus nga wagtangon na kini ang nasinati nga kahadlok sa mga tawo.

Dili mahitabo nga balibaran sa Dios Anak ang pangalyupo sa Iyang inahan sama sa nahitabo sa Kasal sa Kanaan (Cana) diin nahutdan og bino apan sa usa ka hangyo lang ni Maria kang Hesus nahitabo dayon ang milagro.

Atol sa bendita sa lukay o Palm Sunday gikonsagrar ngadto sa Berhin sa Guadalupe ang tibuok lalawigan sa Sugbo taliwala sa hulga sa COVID-19.

Atol sa katapusang bahin sa misa nga gipangulohan ni Archbishop Jose Palma, gibasa ni Cebu Governor Gwen Garcia ang Act of Consecration sa Our Lady of Guadalupe diin emotional ang gubernador sa iyang pangamuyo.

Kitang mga anak kon magkahiusa sa pagsampit sa atong amahan inubanan sa pangaliya sa mahal nga birhin sa Guadalupe, seguradong pamation ug ihatag atong gipangayo nga mawagtang na ang kagaw nga gikahadlokan sa tanan.