EDITORYAL - Andam na sa Mass testing?

Kinahanglang paspasan sa gobiyerno ang paghatag og accreditation sa mga lokal nga mga hospital sa nagkalain-laing mga rehiyon sa nasud kun gusto niining makapahigayon og mass testing sa coronavirus (COVID-19).

Ang National Task Force on COVID-19 nagplanong himuon kini karong Abril 14. Kini human nga daghan ng nangabot nga mga pinalit ug gidonar nga mga testing kits sa nasud.

Magunsa ra man ang kadaghan sa testing kits kun dili andam ang mga lokal nga mga tambalanan sa nasud paghimo og makabasa sa resulta sa mga laboratory test sa mga specimen gikan sa mga tawo?

Sama sa gibuhat sa Singapore, ang mass testing ra maoy nakapadali sa ilang problema sa nagkadaghang kaso sa maong virus.

Apan bentaha sila tungod kay naghinobra ang ilang mga testing kits, may kapabilidad ilang mga tambalanan ug labaw sa tanan gamay ra ilang populasyon kun itandi sa silingang mga nasud lakip na niini ang Pilipinas.

Karon, dinhi sa Pilipinas paigo na sa pagkakaron ang paghimo og dinaliang COVID-19 test sa tanang mga Patients Under Investigation (PUIs) ug mga Patients Under Monitoring (PUMs).

Dili palang dugay nakatabang ang lima ka mga dagkong tambalanan sa nasud lakip na niini ang Vicente Sotto Memorial Medical Center sa pagpahigayon og kaugalingong laboratory test sa COVID-19 kay bag-o raman sila nasuplayan og test kits ug na-accredit sa Department of Health.

Ang kakuwangon sa Pilipinas aning mga may kapabilidad nga mga tambalanan paghimo og massive COVID-19 test ang usa sa mga hinungdan nga nakapadugang sa kabalaka sa publiko.

Ang mga PUIs ug PUMs wala dayon masayod kun natakdan ba gyud sila sa maong sakit, apan tungod kay pandemic na ang virus kinahanglang trataron base sa protokol nga gipatuman, apan kini nakahasol kanila , sa ilang banay ug sa mismong komunidad diin sila nagpuyo.

Pinaagi sab sa massive testing, kadtong PUIs ug PUMs nga negatibo sa COVID-19 mamahimo nang adto ibalhin o dad-on sa mga ordinaryong tambalanan aron maluag ang mga pasilidad para ani nga virus.