MILO nakasamok

Dili ikalimod nga buotan si Cebu City Mayor Edgar Labella, apan nagtuo ko nga dunay mas labaw pa niya nga opisyal nga maoy naghulhog nga mugnaon kining gitawag og Mayor’s Information and Liaison Office (MILO) diha sa lainlaing barangay.

Bisan ang mga kauban nako nga maglilindog ug magsisibya sa radyo nga suod usab ni Mayor Labella, mitambag na kaniya nga wad-on na kining gimugna niya nga MILO, nga susama ra sa Barangay Mayor’s Office (BMO) ni kanhi mayor Tomas Osmeña kaniadto.

Dihang bag-o pa si Mayor Labella sa katungdanan, iyang gipahibalo nga wad-on na niya ang mga BMO ug dili na siya mohimo og susama nga kalihokan. Diha nga mitumaw ang MILO, wa gani dayon ko motoo nga iya kini sa mayor.

Ang angay unta nga himoon ni Mayor Labella mao nga isalig ra niya sa mga kapitan ang pagdumala sa barangay, dili kay magmugna siya nianang MILO nga ang mga tinudlo kaalyado niya sa politika.

Tan-awa karon, mitumaw ang panagsungi sa pagpanghatag sa mga hinabang nga bugas humay gikan sa Cebu City Hall, ug sa mga Enhanced Community Quarantine (ECQ) passes kay daghan ang wa mahatagi kay kontra nila sa politika.

Kon undangon nimo Mayor Labella ang pagmugna og MILO diha sa kabarangayan ning siyudad, nakasiguro ko nga modayeg gyud nimo pag-ayo ang katawhan.

Posible pa gani nga ang mga kapitan nga alyado sa kanhi mayor, mobali sila pagsuporta kanimo. Law-ay man gud kaayo mayor nga gisaway nimo ang pagmugna ni kanhi mayor Tomas Osmeña og mga BMO kaniadto, unya imo ra diay sab nga gisundog.

Mamasin kita kay kini si Mayor Labella lahi sa kanhi mayor nga dili maminaw sa sentimento sa katawhan. Nagpasalamat ko ni Mayor Labella kay mikuot gani siya og kuwarta gikan sa iyang bulsa aron hatagan og hinabang ang mga buta nga akong mga silingan.

Apan subo lang nga bisan ang mga kabus kaayo nako nga mga silingan, ug kadtong naa sa ubang mga barangay, nga wa nay mga trabaho human sa pagpanirado sa ilang mga gitrabahoan tungod sa Covid19, wa gyud makadawat sa hinabang nga bugas.

Ang mga ECQ pass sab, wa gyud miabot sa kabalayan.

Tan-aw nako, kuwang gyud ang 250 mil ka ECQ passes nga ilang gipa-imprinta. Ang kada balay hatagan gyud unta og usa ka pass kay aron dunay usa kanila nga makapamalit og ilang mga kinahanglanon, sama sa bugas, sud-an ug uban pa.

Unya, estriktohon gyud nga kadto ra nga dunay pass maoy tugotan nga makagawas sa ilang kabalayan aron paglikay sa pagkatap sa makamatay’ng Corona Virus Disease-19.