Pagtanggong sa mga bata
Apil sa nataligam-an sa nagkagrabe nga kalibotanong krisis sa Covid-19 mao ang mga bata. Sila ang labing unang naigo sa kusganong mga lakang nga gipatuman sa mga gobyerno sa nagkalainlaing kanasuran: Naputol ang ilang pagtuon kay unang gitak-opan ang mga eskuylahan.
Ang mga bata say labing unang gitanggong sa mga pinuy-anan. Silay gidid-an sa pasiunang curfew nga gipahamtang sa mga dakbayan ug kalungsoran, sa wa pa apila ang senior citizens, nga maoy labing nameligro sa seryuso nga mga komplikasyon sa Covid-19, ang mga ginikanan, sa wa apila ang tanang molupyo.
* * *
Nipasidaan ang United Nations Children’s Fund (Unicef) nga kon magdugay pa ang pagkatanggong sa ilang mga pinuy-anan mameligro ang mga bata nga:
- Di na makabalik sa pag-eskuyla ug mahikawan sa mga benepisyo sa mga eskuylahan, apil nang sustansiyadong mga pagkaon ug tukma nga kasayuran;
- Mahiagom sa nagkalainlaing pangabuso, apil nang child labor, pagpangulata ug pagpanlugos, sama sa nahitabo sa mga bata nga gitanggong sa kabalayan sa Africa sa pagsulbong sa Ebola virus; ug
- Mahikawan sa batakang mga pangalagad medikal, sama sa mga bakuna batok sa polio, tipdas, diphtheria ug hepatitis.
* * *
Tungod sa pagkarakara paghimo sa bisan unsa na lang nga mga lakang sa way pagsabot sa kinatibuk-ang hulga sa Covid-19, bisan sa pasidaan sa World Health Organization (WHO) nga di paigo ang lockdown ug physical distancing kon way mass testing, gitak-opan sa lokal ug nasudnong mga opisyal di lang ang mga utlanan kon dili apil nang ilang panghunahuna sa mas seryusong mga implikasyon sa pagtanggong sa mga bata ug mga dagko ug pag-inutil sa mga panginabuhi ug patigayon.
* * *
Nipadayag og kabalaka si Unicef Executive Director Henrietta Fore nga ang pagtanggong sa mga bata, samtang di hingpit nga makapanalipod nila gikan sa Covid-19, labi na sa kabalayan nga naghuot ug way luna alang sa physical distancing, mas dako ang kahigayonan nga molawog nila sa risgo sa kamatayon sa polio ug ubang mas seryusong mga sakit.
Nipasidaan siya nga ang daotang sangpotanan sa pait nga kahimtang sa mga bata lisod tugkaron sa umaabot. Maong giapura niya ang nagkalainlaing kanasuran sa di pagsalikway sa katandugon sa kahimtang sa kabataan ug sa dinaliang panginahanglan pag-amuma nila.
* * *
- Latest
