Pagbag-o ray tambal sa COVID-19

Hugaw na kaayo ang kalibotan, ang dapit nga gituyo sa Ginoo pag-umol aron maoy himoon Niyang testing ground natong katawhan, kinsa maoy nahimong mga anak sa pagpakasala ni Eba ug ni Adan human nila kan-a ang gidiling bunga sa paraiso.

Maisip nga mga inosenteng anak ta nila. Kay wala man tay labot sa ilang gibuhat.

Apan diha sa ilang pagpakasala, naumol kita ug nahimong bunga. Busa, ang dugo nga naa nato, ilahang dugo sa pagkamakasasala.

Nga sa ato pa, kay kitang tanan makasasala mang daan, ma-impiyerno diay ta?

Dili. God is good, fair and just. Naghimo Siya’g kalibotan aron maoy puy-an natong tanang makasasala, diin dinhi Iya tang sukdon kon dili ba kita pareha kahuyang sa una tang ginikanan?

Unya, kinahanglan makapasar ta sa eksam nga Iyang ihatag nato dinhi sa kalibotan.

Kon sayop atong answer, hagbong. Kon mangodigo o manikas, hagbong.

Kon walay itubag kay nagsalig sa pangopya, hagbong. Busa, ang puntariyahan, impiyerno.

Kay unsa ba diayng eksama ang Iyang isangon nato?

Mga suliran sa kinabuhi. Mga gumonhap. Mga krus nga ipapas-an.

Mga katalagman. Mga deadly disease. Ug kining makalilisang COVID-19 nga giatubang nato karon ug sa tibuok kalibotan, mga pipila lamang kini ka eksam nga Iyang patubagan sa katawhan.

Buwahan, mahibaw-an Niya, kinsa ang adunay hugot-lig-ong pagtuo nga bisag giunsa pa pagkusokuso sa mga mapintas bahad sa demonyo, nagpabiling wala gyod mobulag pagtuman sa napulo ka sugo sa Ginoo nga Iyang gibilin ni Moises.

Kon ikaw walay sala, unya tungod sa gugma’g kaluoy ngadto sa isigkatawo nakigkumbati taman sa ginhawa batok sa COVID-19 ug mamatay diha sa pagpakig-away, angay kang maglipay.

Kay nakapasar ka sa eksam sa Ginoo. Ug maangkon mo ang kinabuhing dayon.

Apan kon ikaw padayong maglunang sa sala ug pabiling wala maminaw sa mga pulong sa Ginoo bisan ning dakong krisis nga mugna sa yawan-ong kagaw, unya mamatay, ikaw ang dapat mahadlok.

Dili pa ulahi ang tanan.

May panahon pa sa pagbasol-hinulsul sa tanang sala, mangayog pasaylo sa Ginoo ug magbag-o sa kinabuhi.

At least, kon patyon man ni COVID-19, limpyo na ang atong tanlag ug kalag nga moatubang sa mapahiyomong kahayag nga mao na ang forever.