Sa Ginoo isalig ang tanan

Huwaman lang nako ang ngalan sa grupo sa nagpakabana alang niadtong mga nagumon sa drugs nga magbag-o nga mao ang Surrender to God o SUGOD.

Sa panahon karon nga naa kita sa gubat batok sa kaaway nga dili makita, wala kitay mahimo sa pagpakig atubang kanila kay wala kitay bawot kay dili man ta kabalos.

Bisan unsaon og likay o atraka sa mga kagaw mahimong makalikay kita apan hangtod kanus-a?

Busa karon pa lang mo-surrender na kita dili sa atong kontra kon dili sa Ginoo nga maoy nagmugna kanato.

Niining panahona dili lang lawas kon dili utok ug pagbati ang naapektohan tungod sa kabalaka sa mosunod nga mahitaho. Gani basin dili pa kaatraka ang virus mapilde na kita sa atong kaugalingon kay wala na kasugakod sa pag huna huna ug sa kahadlok.

Ang ingon niini nga sitwasyon maoy mopahuyang kanato hangtod dali ra kitang buntogon sa kaaway nga nagpaabot lang og benta nga masulod sa atong lawas.

Gani halos tanan daw nangapraning na kay murag gibati nga kahilantanon matag karon og unya bisan walay hilanat, magkalibang bisan wala maglain ang tiyan ug uban pang unsual nga pamation sa lawas tungod sa stress, unya ang stress ra ba kay makamatay kon dili masolusyonan.

Sa ingon niini nga sitwasyon walay laing kadangpan kon dili ang Ginoo kay kita mga nilalang lang Niya.

Nakaplano na ang tanan sa atong kinabuhi nga maoy gimbut-an sa Dios busa mobalik kita kaniya gikan sa paghikalimot tungod sa sobrang pagtan-aw nato sa atong kaugalingon. Suwayi kuno nga i-surrender ang tanan ngato sa Ginoo seguradong mogaan ang kabalaka ug kahadlok nga gibati ug sa ingon sugaton nato ang adlaw nga puno sa paghimaya sa Dios nga maoy naghatag kanato sa atong kinabuhi busa siya ra ang magbuot kanus-a kita dinhi sa kalibutan. Dili kita Niya pakyason bisan pa man sa atong mga pagkuwang kay siya ang Amahan nga mapinanggaon ug mapinasayloon sa mga anak nga dili perpekto sa mata sa tawo apan binuhat sa perpekto nga Magbubuhat.