Hugot nga pagpatuman

Nagkasinabot sa niaging mga adlaw ang mga lokal nga opisyal dinhi sa Metro Cebu ug probinsiya sa Sugbo nga walay lockdown nga ipatuman dinhi taliwala niining dakong hulga sa Coronavirus Disease o COVID-19.

Sa pagkakaron, matag gabii nga curfew ug ubang preventive measures sama sa work-at-home scheme, social distancing ug uban pa ang gipatuman sa dakbayan sa Sugbo ug entiro lalawigan. Kini isip panagang batok sa pagkuyanap sa virus. Hinuon walay rason nga ipatuman sa gobiyerno ang total lockdown dinhi sa Sugbo. Lahi ang nahitabo dinhi kun itandi sa sitwasyon didto sa Metro Manila ug Luzon diin adunay gatusan na ka kaso sa makamatay nga sakit.

Gani, usa lamang ka kaso sa COVID-19 ang nakonpirma dinhi sa Sugbo. Ang maong pasyente gikataho nga naayo na gikan sa maong balatian ug nakagawas na gikan sa usa ka hospital sa dakbayan sa Mandaue. Basin baya kun moani og grabeng reaction kun nakadesider ang mga lokal nga kagamhanan sa Sugbo pagpatuman sa lockdown gumikan sa realidad nga usa lamang ang kaso sa coronavirus ang nakonpirma sa tibuok lalawigan. Sa akong tan-aw higpit ra ang total lockdown dinhi. Ang angay nga buhaton sa otoridad mao ang pagpahugot pagpatuman sa curfew, social distancing ug uban pa isip lakang pagpanagang batok sa maong virus.

Sa niaging Sabado, alang sa paghingusog sa lakang batok sa coronavirus, miimposar na ang kagamhanan lalawigan og 24-curfew alang niadtong mga estudiyante ug mga senior citizens nga nagpangidaron og 65 anyos pataas.

Hinuon walay kwestiyon kini kun ang pagpahugot lamang sa kampanya ang hisgotan. Apan angay lamang usab nga tan-awon sa gobiyerno ang seryosong epekto niini. Sama pananglit kun wala nay makaon o nanginahanglan sila og tambal unya maglisod na hinuon nga makagawas ang katawhan gumikan sa 24-hour curfew.   Wala siguroy kwestiyon kun adto sa kaulohan ipatuman ang lockdown ug 24 oras nga curfew. Grabe na ang pagsaka sa mga kaso sa COVID-19 didto ug makontrol lamang kini pinaagi sa pagpursige nga pagpatuman sa lockdown.

Wala ko moingon nga dili usab kita maghigpit dinhi. Sa akong nakita, igo na ang community quarantine, pagsira sa mga establisimento, curfew matag gabii ug uban pa nga kasamtangang giimposar dinhi sa Sugbo.

Apan nagkinahanglan kining tanan og hugot nga pagpatuman sa otoridad aron nga motuman gayud ang katawhan.