Virus invasion

Karong panahona anaa kita sa gubat nga hilabihan ka peligro ug dehado ang sitwasyon sa mga tawo tungod kay dili man nato mabantayan ang atong mga kontra nga naa na diay sa atong palibot.

Walay bisan unsa nga gamhanang armas gikan sa mga labing gamhanang nasod sa kalibutan ang makabuntog kon pwersa na sa kasundalohan ang hisgotan.

Ang mga terorista wala ra sa kumingking sa atong invisible enemy nga mao ang coronavirus disease o COVID-19, ang mga terorista mahimo man pulboson kay makita man bisan unsaon nila og tago.

Apan ang virus nahisama sa usa ka alien nga wala gyud kitay dag-anan kon ugaling huyang ang depensa nato sa akong kaugalingon.

Gani ang uban mohulagway sa nahitabo karon nga ikatulong gubat sa kalibutan nga mao ang pinakagrabe kay dili man armas de fuego ang gigamit kon dili mga kagaw.

Abi nako nga kutob ra sa pelikula nako kining ingon niini nga talan-awon makita apan nahimo naman kining realidad.

Nausab ang tuyok sa kalibutan, apektado ang tanan, walay gipili pobre ug adunahan, ma gobiyerno man o sibilyan managsama og gibating kabalaka.

Bisan ang sentro sa pagtuo sa mga relihiyon kansang patakaran mao nay nalatid kaniadto pa apan sa pagtay-og niinong coronavirus, nausab ang tanan.

Kining gubata karon gikinahanglan ang kahiusahan sa katawhan sa tibuok kalibutan, mao kini ang gitawag nga “HUMANITY VS. THE UNSEEN ENIMY”.

Mogawas nga mananaug niining gubata mao ang katawhan kun sensiro ug seryoso sa paghimo og mga hinagiban pagbuntog sa atong kontra nga tagolilong o dili makita.

Labaw sa tanan ang pagtuo nato sa Ginoo ang makahatag og paglaum ug pamaagi aron makalingkawas kita sa virus invasion.

Dili pa uwahi ang tanan sumpoon ug pildihon nato ang atong kontra, kagaw lang sila, kita tawo nga nilalang sa Dios.