Epekto sa trabaho

Tungod sa epekto sa coronavirus disease (COVID-19) ug sa gihingusgan nga kampanya sa gobyerno pagpugong sa pagkatap sa kagaw, nanirado na ang mga malls ug department stores sa Sugbo.

Nagpabilin hinuon nga bukas ang mga supermarket. Niining pagpanirado sa mga malls gatusan ka mga trabahante ang nawad-an og trabaho.

Alang sa mga ordinaryong mamumuo nga nagsalig sa ilang sweldo sa inadlaw nga panginahanglan, kalbaryo ni sa ilang pamilya.

Unsaon nga makalahutay sila hangtud nga mahuman ang krisis. Ang uban hinuon nga mga dagko nga kompaniya mihatag gihapon sa suholan sa ilang mga trabahante bisan gihinong ang ilang operasyon, apan ang uban way swerte.

Gawas sa mga trabahante og kompaniya, laing hut-ong nga apektado mao ang public transportation. Daghan sa mga driver nga akong nahinabi ang mitiyabaw na sa kalisud tungod sa kamingaw sa ilang pamasahero.

Usa ka taxi driver nga akong nasakyan miingon nga dili sila mamatay sa COVID apan gutom maoy ilang kamatyan.

Nagsalig kuno sila sa matag-adlaw niyang kita sa pagpamasahero alang sa ilang konsumo.

Nakasabot kaayo ko sa kahimtang sa mga ordinaryong trabahante ug mga driver nga nabalaka unsay ipakaon sa ilang pamilya matag-adlaw.

Apan angayan sab natong hunahunaon nga kun di himuon sa gobyerno ang mga lakang pagpugong nga mokatap pa ang kagaw posibling mas grabe ug madugay pa ang krisis nga atong nasinati.

Importe kaayo nga sa mosunod nga usa ka buwan mapugngan sa kagamhanan ang pagdaghan sa mga kaso sa COVID aron mabalik sa normal ang atong sitwasyon.

Ug kini mahitabo lang og ang matag-usa nato mosakripisyo ug mosunod sa tanang lagda labi pa ang paglikay sa paglaroy-laroy.

Importante sab nga dunay epektibong programa ang gobyerno pagtabang sa labing apektado sa krisis.

Kinahanglang ang pundo sa kagamhanan gamiton sa pagpamalit og mga kahimanan pagbatok sa kagaw ug pagtabang sa mga apektadong pamilya aron sa ingon mapugos sila nga magpuyo sa ilang tagsa-tagsa ka mga pinuy-anan. Ang dakbayan sa Sugbo namalit og 100 mil ka sakong bugas aron ipang-apud apud sa mga apektado. Husto ang maong lakang apan hinaut nga dili kabay-an og politika ang pagpatuman niini. Hinaut nga ang tinuod gyud nga nagkinahanglan ang makadawat sa maong tabang ug dili ang pipila lang nga mga kaalyado sa politika.