Kanselado man tuod ang Misa

Ang atong talahurong Arsobispo Jose S. Palma ang niluwat og circular sa paghunong una sa mga Misa ug mga kalihukang liturhikal uban sa mga tawo tungod ning maong Corona Virus.

Subo man tuod ning buhaton apan wala tay mahimo gawas sa pagsunod aron lang pud pagpanalipod sa katawhan gikan ning maong virus.

Hinuon wa man gyud wad-a ang misa nahitabo lang nga himoon kini on the air ug tan-awon lang sa mga tawo sulod sa ilang mga panimalay. Ang ilang pagkalawat himoon na lang sa paagi nga espirituhanon.

Daghan gyud ang naapektuhan niini ug gani daghan ang giabot og tumang kabalaka kun pananglit magdugay kining maong pandemic.

Maong mas hugton nato ang atong pag-ampo. Kay walay butang dili mahimo kun Dios na ang mohimo sa ingon. Gamhanan siya kaysa Corona Virus.

Sa atong bahin, diha pa nato makita ang dakong bili sa usa ka butang labina kun ato lang kining gi take for granted samtang nia pa kini kuyog nato.

Sama gud sa Misa nga usahay nahimo na lamang pakapin sa mga gipanghimo sa mga tawo. Mosimba lang kun ganahan, mosimba lang kun gikinahanglanon apan bisan kun mabato ra ang balay gikan sa simbahan, dili gyud maningkamot nga mo exert og effort makasimba man lamang. Apan karon tan-awa, nahikawan nuon kita sa kahigayonan nga makighimamat sa Dios diha sa Balaang Eyukaristiya.

Hinuon, alang nako dili ni usa ka silot gikan sa kahitas-an kondili pinaagi ning maong kasinatian karon mahigmata unta kita sa kamatuoran nga haw-ang ang atong kinabuhi kun wala ang Ginoo nga naghatag og kusog gikan sa langit.

Ang akong mga misa Misa ad Orientem kay walay manimba ug dili sad mahmo ang live streaming kay daghan sa akong mga parokyano ang walay mga android phones ug wa sab tv sa ilaha.

Apan bisan pa niini hugtanon akong nagtuo nga makalingkawas ra gihapon kitang tanan gikan ni Coronang Dagmalan.