Simbahan gilupig ni COVID-19?

Gahom sa hugot pagtuo ngadto sa Ginoo batok mamumunong corona virus (COVID-19) maoy nagsabong karon sa matag kasingkasing sa tanang magtutuo. Kinsa kahay modaog? Ang simbahang gipatukod ni Hesus kang Pedro, o ang COVID-19, nga gidudahang man-made?

Matyd pa, samtang giumol ang maong virus, giandaman sab kinig tambal. Malas lang, kay wala pa makompletog imbento ang medisina, disgrasyang nakalusot ang virus sa wala pa ang tukmang takna nga i-testing. Hinungdan, nga paspas kaayong mikuyanap.

Ning umaabot Abril o Mayo, pangagpas sa mga manggidudahon nga ang China may mga baligya nang tambal nga makapatay-sumpo sa COVID-19. Dugang pangagpas sa mga manggidudahon.

To see is to believe. Kun unsay atong nakita nga tinuorayng mitumaw, mao ra gyuy angay natong tuohan.

Sama sa gisangyawng balita nga wad-on na kuno ang tanang naandang misa sa simbahan ug ang tanang relihiyosong kalihokan sulod ug gawas sa simbahan sugod Marso 18 hangtod sa wala pa mahibaw-i kanus-a mahibalik. Hinuon, makamisa ang pari nga walay manimbahayng gitugotang motambong. Apan ang ilang pagmisa, madungog sa radyo ug makita sa telebisyon, o Facebook.

Kinsa bay magdahom nga mahitabo kini? Ang simbahan nga Iyaha sa Ginoo, nahadlok sa COVID-19 nga hinimo sa demonyo? Dili ba miingon si Hesus sa Iyang mga tinun-an: “Kay ang maninguha pagluwas sa iyang kinabuhi mawad-an ini. Apan ang mawad-an ini tungod Nako, makabaton ini. Unsay maganansiya sa tawo kun mabuntog niya ang tibuok kalibotan, apan malaglag ang kaugalingon?” (Mat. 16:25-26).

Bitaw, akong klarohon. Ang Simbahang Katoliko wala mahadlok. Gisakripisyo niya ang naandang obligasiyon, bahala nag makaanig grabeng pagsaway, tungod sa usa ka mahigugmaong tumong – aron mapalayo ang katawhan ning padayong pangmangtas ni COVID-19, kinsa ubay-ubay nang kinabuhing nakalas.

Total, God is everywhere. We can communicate with Him thru miraculous prayers anywhere. Ato siyang ampoan ug pakamatyan. Kay ang mawad-ag kinabuhi tungod Niya, makabaton og kinabuhing dayon.

Ang mga dagkong lider sa atong nasod, doctors, frontliners, kapolisan ug kaparian, mga instrumento sila nga gihiusa sa Ginoo aron magtinabangay sa pagpakigkombati ning gamhanang kagaw nga mipakurog sa tibuok kalibotan. Giniyahan sa Espiritu Santo ang nakab-ot nilang hukom unsay angay buhaton aron tanang katawhan maprotektahan ug maluwas. Busa, ato silang sundon.