Walay gipili ang virus

Basta moabot na gani ang trahedya, wala gyuy kini gipili sa mga maapektohan.

Dato ka man o pobre, babaye ka man o lalaki, bata ka man o tigulang, ratsada gyud ang tanan, pulos biktima sa kabangis sa pagdagmal niini.

Dinhi sa Pilipinas, naanad na kita pagsagubang sa mga kalamidad sukad pa 2sa panahon sa atong katigulangan.

Bagyo, sunog, landslide ug uban pa, halos tanan na nga trahedya ato nang nasinati. Nahinumdom ko sa paghapak ni Yolanda, ang kinakusgang bagyo sa kasaysayan sa kalibotan nga dinhi sa Kabisayaan mikusokuso halos pito ka tuig na ang nakalabay.

Dato ug pobre biktima niadtong maong supertyhoon nga mikutlo og subra sa 6,000 ka kinabuhi.

Ug matawag usab nga dakong kalamidad ang pagdagsa karon sa gikahadlokan nga Coronavirus Disease o COVID-19.

Walay gipili ang pagkuyanap niining maong sakit nga mitakboy na sa halos tanang kontinente sa kalibotan.

Mitay-og kini matag sektor sa katilingban ug niadto’ng mga ilado sa sosyodad. Gan, ang ilado nga aktor nga si Tom Hanks ug asawa niini natakbuyan man sa maong balatian.

Samtang nataptan usab ang asawa sa primero ministro sa Canada.

Dinhi lamang sa Pilipinas, usa si Senador Migz Zubiri sa subra sa usa ka gatos nga natakboyan sa COVID-19. Wala siya mibiyahe gawas sa nasud apan nakuha niya ang maong sakit pinaagi sa local transmission.

Walay dag-anan kita niini kondili ang pagsunod lamang sa mando sa kagamhanan ug mga health authorities.

Nag-una niini ang dili pagpakighabolibilo sa mga pangpublikong lugar ug ang kanunay nga paglimpiyo sa lawas.

Wala pay tambal nga nadiskobrehan batok niining seryoso ug makamatay nga balatian nga mikusokuso karon sa kalibotan ug mipatay na og liboan. Mao nang gitagna nga daghan pang matakdan niining maong virus.

Kun kanus-a molurang ang maong COVID-19, wala pa kita nasayod.

Ang importante mao nga adunay kitay panagang batok niini. Ug kini naglangkob sa pagmatngon kanunay ug disiplina sa kaugalingon.