Gapos sa Utang Kabubot-on

Angayan ba nga magpagapos kita sa Utang Kabubot-on? Mao kini ang pangutana nga seguro halos tanan motubag nga angayan lang nga magbaton kita og ingon niini nga kinaiya aron dili kita mahulagway nga ingrato.

Apan kon atong hunahunaon pag-ayo dili matawag nga utang ang paghatag og tabang ngadto sa atong isig ka tawo.

Kong ingon niini, nagpasabot ba nga dili angayan nga isipon nato ang pulong “Utang Kabubot-on?”

Bitaw kon motabang kita sa atong isig ka tawo hinukad kana gikan sa kasingkasing maong mihatag kita og kaayohan sa uban nga wala magpaabot og bugti gikan sa tawo nga atong natabangan.

Malipayon kita nga nakatabang sa uban ug ang kalipay nga atong gibati mas labaw sa pa bugti o bayad sa nahimo natong kaayohan sa atong isig ka tawo.

Pero ambot lang kon ingon ba niini ang hunahuna sa uban kay kon masuko ra ba kita sa tawo mangita gyud dayon og buslot aron makaboyboy sa tawo nga atong gikalagotan og modayon sa pag ingon “WALA GYUD KAY UTANG KABUBOT-ON NGA AKO RA BAY NAGHIMO NIMONG TAWO BLA BLAH...”

Kon ingon niini ang atong pamatasan nagpasabot nga kita mismo nagapos niining kinaiyaha nga kay subconsciously nagpaabot diay kita og balos sa kaayohan nga atong nahatag.

Maayo og wala nalang kita motabang kon nagpaabot kita og bayad nga duna pay interest, mahulog sa wala nay bili o essence ang atong nahimo kay gipakasama man nato sa usa ka investment ang utang kabubut-on.

Alang sa mga tawo nga nakadawat og tabang o kaayohan gikan sa uban, angayan lang pud nga ipaambit niya ang kaayohan inig abot sa panahon nga duna usay laing nagkinahanglan.

Kini ang prinsipyo sa “Pay it Forward” nga imong ipaambit sa uban ang nasinati nimo dihang natabangan usab ikaw.

Sa tawo nga nakatabang nimo usa ka higayon niana, kon ugaling nagkinahanglan usab siya og tabang nga sa imong tan-aw angayan, ayaw ihikaw paghatag kaniya.

Buhaton nimo kini dili tungod kay nakautang ka og kabubot-on niya kon dili nagpakabana ikaw isip usa ka tawo nga dunay kasing kasing nga maantigong magpakabana sa uban.

Kon magpagapos kita sa utang kabubot-on posibleng mosangpot kini og dili maayo sama nalang sa uban nga motabang kunohay apan naay hidden agenda nga gamiton ra diay ka alang sa iyang vested interest.

Tungod sa imong kaikog anang tawhanan duphan o unongan  nimo siya bisan pa og sayop ang iyang gihimo.

Busa angayan bugtoon nato ang gapos sa utang kabubot-on nga dili kita mahimong ingrato pinaagi sa pagpatigbabaw sa atong prinsipyo.