Kausaban sa simbahan angay bang sundon

Tungod sa pagkatap sa mananakod nga coronavirus (Covid-19) sa tibuok kalibotan, daghang naandang praktis sa Simbahang Katoliko ang gibag-o. Ang The Lord’s Prayer, Amahan Namo nga kanhi gitugot sa simbahan nga magkuptanay ang gidupang kamot sa mga manimbahay, karon  gidili na.

Ang sagradong ostiya nga sa among panahon sawron gyod sa gidalang paleta sa kulitos uban sa mipakalawat nga pari, kinsa mao gyoy mangunay paghungit sa among baba, karon ang mangalawat na maoy mohungit Niini sa ilang kaugalingon.

Labi na nga may order gikan sa kadagkoan sa simbahan, diin gianunsiyo nga sa dili pa sugdan ang pagpangalawat, ang mangalawat nay mohungit sa ostiya.

Ug dili na pari. Hinuon, dili tanang simbahan ang misunod. Ambot, ngano kaha?

Hasta ang Ash Wednesday, gihilabtan. Ang Catholic Bishops’ Conference of the Philippines pinangulohan ni Davao City Archbishop Romulo Valles, mipagawas og circular nga imbes ang abo adto ibadlis sa agtang sa mga magtutuo, anha na kini ibisibis (sprinkle) ibabaw sa ulo.

Usab, panahon sa ‘ipakita ta ang pag-igsuonay,’ gidid-an tanan sa pagginaksanay, hawok o besobeso. Ngano?

Tungod kuno sa grabe nga pagkamananakod sa kagawng Covid-19, diin daghan nang natakdan ug nangamatay sanglit wala pa masakpi ang tukmang tambal nga makaayo.

Alang sa mga hugot nga magtutuo, angay ba kining sundon? Tugoti nga kining napunitan kong usa ka hitabo, maoy makatubag.

Usa ka hamtong ginang naabtag baha sa dakong suba. Kay dako siyag pagsalig sa Ginoo, wala gyod batiag kahadlok. Hinuon, nag-ampo siya.

Taudtaod, may motorboat nga miabot sa iyang tungod og giagni siya sa pagpasakay.

Pero gibalibaran niya kay lawom iyang pagsalig sa Ginoo. Ug segurado nga luwason siya Niya.

Unya, may tugboat ug helicopter nga miduol niya aron pasakyon. Apan gibalibaran gihapon. Kay matod niya: “My faith to the Lord is very strong. He will surely save me!”

Aw, namatay ang ginang. Dihang nakaatubang na niya ang Ginoo sa langit, iya dayong gibasol. “Lord, pwerte nakong ampo nga luwason Nimo, wala gyod ko paminawa Nimo.”

Mitubag ang Ginoo: “Anak, abi nimo, sa una mo pa lang pagsangpit, gipadad-an na tikag motorboat. Unya gisundan pa sa tugboat ug helicopter. Pero kining tanan, imong gibalibaran.”