2 ka Pinoy ug 3 ka langyaw
Gawas sa duha ka bag-ong kaso sa Covid-19 sa Pilipinas, nga sa labing unang higayon pulos mga Pilipinhon, may tulo sab ka langyaw nga nahibaw-ang natakdan sa kagaw pagbalik sa ilang mga nasud gikan sa Pilipinas ug gisusing kahigayonan nga mananakod na samtang niduaw sa atong nasud:
- 44 anyos nga lalaking Hapones nipuyo sa tulo ka hotels sa Metro Manila niadtong Pebrero 21 hangtod sa 28;
- 30 anyos nga lalaking Taiwanese nakaduaw sa Dakbayan sa Manila; ug
- 60 anyos nga babayeng Australian nga nabalik sa Sydney niadtong Marso 3.
* * *
Ang Australian nitambong og kasal sa Manila niadtong Pebrero 13 sa wa pa moadto sa Pangasinan.
Nibiya siya sa Pilipinas niadtong Marso 2 ug napamatud-ang may Covid-19 pag-abot na sa Sydney.
Ang Hapones nilupad niadtong Pebrero 28 paingon sa Thailand diin siya gihilantan pagka Pebrero 29, niadto sa Cambodia niadtong Marso 3 ug nipauli niadtong Marso 4 sa Japan diin na-positibo siya sa Covid-19.
* * *
Nipahibawo ang Centers for Disease Control sa Taiwan nga ang ilang “Case #44” niduaw sa Pilipinas uban sa iyang mga higala sugod sa Pebrero 28 hangtod sa Marso 3, nag-diarrhea niadtong Marso 2, nagluya pagbalik sa Taiwan niadtong Marso 3 ug nahibaw-ang may Covid-19 niadtong Marso 5.
Nangagpas ang Taiwan nga dinhi sa Pilipinas natakdan sa kagaw ang pasyente.
Nakaanhi ang mga Taiwanese kay gilibkas sa Pilipinas ang upat ra ka adlaw nga travel ban batok sa Taiwan niadtong Pebrero 14.
* * *
Sama sa naandan, nihit ang mga detalye ni Health Secretary Francisco Duque III sa duha ka bag-ong natakdan sa Covid-19, pulos lalaki, pulos taga Metro Manila, pulos nangasakit og siyam ka adlaw una nakuhaan og swab samples aron mahiling sa laboratoryo ug pulos padayon karong giatiman sa Research Institute for Tropical Medicine (RITM) sa Dakbayan sa Muntinlupa:
- Ang unang pasyente, 48, nakabiyahe sa Japan, gihilantan niadtong Pebrero 25, napamatud-an sa RITM nga may Covid-19 niadtong Marso 5 ug gideklarar nga luwas ang kahimtang; ug
- Ang ikaduhang pasyente, 62, giubo niadtong Pebrero 25, nakaplagan sa RITM nga may Covid-19 niadtong Marso 5 ug tungod sa iyang diabetes ug taas nga presyon sa dugo gihulagway sa mga doktor nga tandugon ang kahimtang.
* * *
- Latest
