‘Nisukol na ang dinaug-daog’

Bisan sa iyang nahiaguman karon diin nag-atubang siya og daghang kaso, wala magbasol si Alchie Paray sa iyang pagpang-hostage didto sa usa ka mall sa Greenhills, San Juan. Giangkon ni Paray nga ang tinubdan sa iyang kasuko mao and dili makiangayon’g pagtratar kanilang mga guwardiya sa Mall security officials. Kon himoan og pelikula ang iyang sugilanon, haom ang ulohan nga gigamit sa usa ka drama sa radio kanhi nga nagkanayon: “KON MOSUKOL NA ANG DINAUG-DAUG.” Ang nakalahi lang kay sa drama nagmadaugon man ang bida, apan ni’ng higayona, natanggong man hinoon siya.  Kadakong baligho!

Limpiyado ang pinoy

Ang City Legal Office (CLO) mirekomendar ngadto kang Mayor Edgar Labella sa pagpasira sa usa ka food stall sa Larsian tungod sa kakulang niini sa business ug sanitary permits.  Mao usab kining maong stall ang nakit-an nga adunay ilaga nga nagsuroy-suroy sulod sa maong stall. Sa ubang nasod, gikataho nga gipangbaligya ang mga karne’ng ilaga isip barbecue.  Dinhi sa Pinas, ang ilaga mahinmong hinungdan sa pagpasira sa imong negosyo.  Limpiyado gyud diay ang Pinoy. Saoonz!

Bisan nagtangag moingon ug “waa”

Human mikatap ang video diin nakita ang usa ka senador nga daw natulog atol sa iyang live interview, ang host sa maong TV program nga si Pinky Webb mitataw nga wala mahikatulog ang Senador niadtong higayona.  Adunay pagya ang atong katigulangan sa maong pahayag ni Webb nga nagkanayon: “Mora man og langgam nga UWAK; bisan naay gitangag moingon gihapon nga “WAAA.” Matulog man gani ang mantika, tawo pa kaha.  Pagsure uy!

Balaod daghan, way natuman

Gimandoan ni Presidente Duterte pinaagi sa usa ka Administrative Order (AO 23) ang tanang ahensya sa kagamhanan sa pagwagtang na sa mga proseso sa transaksyon nga“bug-at ug maghatag kalisod” sa publiko.  Nindot unta ang katuyoan, apan dili lang una kita mohandom sa maayong sangputanan. Kay lage dinhi sa Pilipinas, balaod ra ang midaghan, way klaro ang pagpatuman.  Pastilan!

 “Operation daghang chance”

Gihulagway ni Konsehal Dave Tumulak nga makapaalarma na ang panghitabo nga pagpunay og eskapo sa  mga kabataan nga nagpuyo sa pasilidad nga Operation Second Chance. Nagtoo ang Konsehal nga adunay problema sa pama-agi sa pagdumala sa maong pasilidad  ug angayan bag-ohon o repasohon.  Dili kaha angayan usab ilisan ang ngalan sa pasilidad?  Kinahanglan pa man kaha nga hatagan pa ug dugang ‘chance’ o kahigayonan ang mikagiw nga kabataan? Sugyot sa akong higala, nganlan lang ang pasilidad og: “Operation Daghang Chance”.  Madahaaan!