Hain na ang kaligdong?

Unsay nahitabo sa kaligdong ni Cebu City Mayor Edgardo Labella? Gikaon naba siya sa hingpit sa naandang sistema sa politika?

Kini pipila lang sa mga pangutana sa mga higala ug nakaila ni Labella niadtong nagsilbi pa siya isip direktor sa Office of the Ombudsman Visayas.

Ug dako ang akong pagtuo nga ang maong imahin sa kaligdong maoy nagsilbi niyang hinagiban atol sa piniliay aron magmalampuson sa iyang ambisyon sa politika.

Apan sukwahi sa imahin sa kaligdong ang labing awahi niyang lakang pagtukod og Mayor’s Information and Liaison Office (MILO) diha sa kabarangayan.

Nagpakita ni sa laing dagway sa iyang pagkatawo, ug hinaut nga dili ni maoy tinuod niyang batasan ug kinaiya.

Atong pahinumduman ang mayor sa iyang pagsupak kaniadto sa Barangay Mayor’s Office (BMO) panahon ni kanhi mayor Tomas Osmeña.

Daw sa nakalimot siya sa iyang baruganan, ug ang labing dakong baligho mao nga wala lang siya makalimot iya pang gikopya ang maong sistema.

Samtang ang Department of Interior and Local Government (DILG) miingon nga way illegal niini, apan klarong pag-usik usik ni sa buhis sa katawhan aron iabante ang iyang personal ug politikanhong interest.

Ang report nagkanayon nga aron pagmintinar sa MILO diha sa 80 ka mga barangay, nagkinahanglan ang dakbayan og 240 ka mga job order workers kang kansang sweldo adto kuhaon sa pundo alang sa social services.

Gawas niini migahin sab ang dakbayan og P5,000 nga pundo isip abang sa ilang buhatan matag barangay kun di mohatag og libre nga luna ang kabarangayan.

Gasto nga wala kinahanglana tungod kay mamahimong ang mga opisyal sa barangay ang tahasan sa pag-atiman sa panginahanglan diha sa kabarangayan.

Inay nga magbutang og laing ang-ang sa burukrasya nga maghaling lang og pagkabahin-bahin, mas maayong palig-unon ni Labella ang iyang relasyon sa mga opisyal sa barangay pinaagi sa pagtugyan nila sa responsibilidad pag-atiman sa mga panginahanglan ug magsilbing tulay paingon sa buhatan sa mayor.

Mao ni matang sa pulitika nga angayang buhaton sa usa ka ligdong ug matinud-anong politiko.

Ang pangutana, andam ba si Labella nga mohimo niini?