Ang Petra sa Jordan

Salamat ni Rasha kay iya gyud ming gi-tour sa Petra sa Jordan.

Diin didto akong nakita ug gipanaw ang dapit diin gihimo ang shooting sa Indiana Jones nga salida.

Sa akong pagsuroy didto akong nakita kun unsa ka grabe ang ilang architecture.

Daw lisud katuohan apan angayang tuohan nga metikoloso kaayo ang pagkakulit sa maong mga lubnganan sa panahon sa mga Nabateans.

Gani, ginaingon pa nga si Herod the Great dunay asawa man nga usa ka Nabatean Princess.

Agianan gyud diay ang maong dapit kun maghisgot na kita og mga patigayon niadtong unang panahon. Apan ang nakapahimo niining interesante mao man nga sa dihang nilihok ang mga tectonic plates nahulma ang maong mga canyons.

Ang pulong Petra usa ka pulong nga dunay kalambigitan sa Griyegong pulong Kepas nga nagkahulogan og bato.

Gani, dinhi man gikan ang ngalan ni Pedro. Niingon si Jesus: “Ikaw si Pedro ug ibabaw ning Bato tukoron ko ang akong Simbahan bisan gani ang Impiyerno dili man makabuntog niini.”

Sa atong kinabuhi sa pagtuo dunay mga higayon nga makasinati kita og pagtay-og.

Ang maong pagtay-og nagkahulogan man og pagpahigmata kanato gikan tingali sa atong pagkahisalaag.

Ang maong pagkahisalaag usahay maoy nipalayo kanato gikan sa tinud-anay nga sukaranan sa seguridad nga walay lain kondili ang Dios mismo.

Ang mga pagsulay dunay posibleng mga epekto. Mahimong makapalig-on kini sa atong pagtuo o dili ba kaha makapalayo nato sa Ginoo gumikan sa atong mga pagmahay ug pagtalaw.

Taud taud ang akong lakaw. Kun wa ko masayop mga duha gyud ka oras kapin kun kulang.

Kuyog nako ang mga laing magpapanaw sa kinabuhi niadtong tungora, wala koy laing natuwaw kondili ang pagdayeg sa Diosnong gahum ug kaantigohan.

Iyang obra maestra ang tanan! Kinsa ba gud akong mangutana sa iyang hunahuna.

Ang pagtay-og diay usahay makapahimo natong mahulma sa paagi nga sakit man tuod apan makaayo ug mopagawas sa atong kaambong diha sa mata sa Dios.