EDITORYAL - OFWs ug COVID19

Ang mga Overseas Filipino Workers maoy labing duol nga matakboyan niining padayong nagkatap ug nagkadaghang kaso sa coronavirus nga COVID19 tungod sa klase sa ilang trabaho didto sa gawas.

Sama nalang sa mga Pilipinong crew sa cruise ship nga Diamond Princess diin kapin sa 500 ka mga crew mga Pilipino nga karon gi-quarantine didto sa Yokohama sa nasud sa Japan.

Tungod kay apil sa ilang trabaho ang pagabi-abi sa mga tawo sila maoy bantang kaayo sa sa peligro nga matakboyan.

Kay dili man praktikal nga ipahunong ang deployment sa mga OFWs, bugtong panalangin nalang nila ug sa ilang mga kabanay nga dili sila masagol sa mga tawong infected na sa maong sakit.

Sa pikas bahin, ang gobiyerno sa Pilipinas mohimo unta og dugang mga lakang aron maprotektahan ang mga OFWs kansang mga trabaho kinahanglang makig-atubang sa daghang mga tawo sama sa kaso sa Diamond Princess.

Sa pagkakaron, ang 80 na ka mga Pilipino sa maong barko ang gikatahong infected na sa COVID19 ug toa na sila karon sa tambalanan sa Japan. Ang napulo nakagawas na sa tambalanan.

Samtang 400 kapin na nila ka mga kauban ang gipapauli na sa Pilipinas ug kasamtang gipaubos sa quarantine sa New Clark City sa Pampanga.

Gawas sa barko, duna pay ubang mga OFWs nga landbase nga moabi-abi og daghang mga tawo sama sa mga malls. Gani dunay lima ka mga OFWs sa United Arab Emirates, Hong Kong  ug Singapore ang natakboyan na sa maong sakit.

Sa pagkakaron, kinahanglan nila ang suporta sa gobiyerno ug labaw sa tanan dili angay kalimtan ang uban pang mga OFWs nga naka-deploy sa uban pang mga barko ug mga kanasuran.

Kinahanglang dunay giandam nga contingency plans ang nagkadaiyang embahada sa Pilipinas para sa kapin pa sa 10 milyones ka mga OFWs nga wala pa matakboyi sa maong sakit. Ang dolyares nga ilang ipadala sa Pilipinas dako og tampo sa ekonomiya sa nasud.