Patay gihimong capital sa sugal

Nakaani og negatibong reaksyon sa mga tawo ang programa karon sa kapolisan nga paghingusog sa kampanya batok sa tanang matang sa sugal.

Lakip na niini ang sugal atol sa haya sa mga minatay nga mao nay naandan nga gahimoon sa mga tawo palabay sa oras aron dili dukaon o aron makasugakod sa pagbilar.

Laing tumong mao nga makakwarta ang tagtungod pinaagi sa tong nga makuha gikan sa pusta sa mga nagsugal.

Matud pa sa uban nga makatabang kaayo kini alang sa mga kabus nga pamilya aron naa silay kakuhaan og kwarta nga magamit sa pagpalubong sa patay.

Busa bagulbol ang mga tawo kay ngano kunong initan pa nga ginagmay ra man kini og mahunong ra man usab kon ilubong na ang patay.

Apan wala matarog ang kapolisan niini tungod kay ipadayon gyud ang pagsumpo sa tanang matang sa sugal.

Sumala sa pangulo sa Police Regional Office 7 P/Gen. Albert Ignacius Ferro nga tugotan ang paglingaw lingaw bisan usa lang ka lamisa basta walay kwarta nga gamiton.

Apan matud sa pangulo sa Cebu City Police Office P/Col. Engelbert Soriano nga iyang idili bisan usa ka lamisa kay mamahimo unya kining panag ingnan sa uban hangtod dili na makontrol modaghan labi na kun walay magbantay nga pulis.

Nakasabot ang PNP sa pulso sa mga tawo apan mopatigbabaw gyud ang lagda sa pamalaod nga kinahanglan sundon.

Gibutyag sa liderato sa kapolisan nga naay mga tawo nga nag take advantage sa sitwasyon nga maoy mag finance sa sugal sa patay.

Mao ni ang hinungdan nganong molanat og dugay ang paghipos sa patay kay nakakontrata na sa financier bugti sa kwarta nga ihatag niini.

Kini ang realidad nga masayran sa uban nganong estrikto kaayo ang PNP sa ingon niini nga sugal kay gisakyan sa ubang tawo nga hakog og sapi.

Alang sa mga tawo igo nalang sa pagbagotbot kay unsaon man naa may balaod nga sundon.