Kining mga tricycle ug mga pedicab

Atong matawag nga tukma kaayo kining kamanduan sa Department of  Interior and Local Government (DILG) nga nagdili sa mga tricycle ug mga pedicab pagpamasahero subay sa mga dagkung kadalanan o national highways isip kabahin sa kamapanya karon paglinis sa kadalanan gikan sa mga obstruction.

Gi-issue kining maong kamanduan ni Sec. Eduardo Año sa DILG tapus madawat ang mga taho nga nagpadayon ang maong mga tricycle nagpadayon pagpamasahero subay sa mga national highways, despite sa maong mga kamanduan.

Dugang niini, matud ni Año, kining maong kamandduan nagdili paglabang ug pag-u-turn subay sa mga national highways, for safety reasons o aron kalikayan ang mga disgrasya.

Gawas sa Republic Act 4136 o ang Land Transportation and Traffic Code, ang DILG naka-issue na og samang mga memorandum circulars. Sa ato pa, gahi gayud og mga ulo ang mga nagmaneho niining matang sa pamasaheroan o pakyas ang mga hingtudngdang ahensiya sa gobyerno pagpatuman niini.

Nagmando usab si Año pag-umol og mga tricycle task forces nga maoy molaraw o mo-formulate sa mga takdo nga route plans alang niining maong matang sa mga sakyanan sa kadalanan.

Ang maong task forces maglangkob sa mga Mayor isip chairman ug sa chief of police isip vice chairman, ug pagasakpan sa committee chair sa transportation or public safety sa mga Sanggunian, ang presidente sa Liga ng mga Barangay, ug ang mga pangulo sa tricycle regulatory board, sa Department of Public Order and Safety, the planning and development officer, the head of the sa traffic management office, ug ang planning and development officer.

Ngilngig kaayo ang composition ning maong task force apan, it seems nga wala kini mapatuman sa atong mga local government officials.

Mipasidaan si Año nga pasakaan og mga kaso administratiba ang mga local officials nga dili mopatuman sa iyang mga direktiba.

Giingon dinhi nga “compliance with the trike ban order will form part of the validation and assessment of the compliance of local government units to the continued implementation of the presidential directive on road clearing.”

So, there you are, ang maong mga kamanduan, alang ba lang sa kaulohan o alang ba usab sa tanang mga LGUs sa tibuok nasud, kay ang maong mga suliran sa kadalanan, ato man usab nasinato dinhi sa atong dapit.

Ug dugang niini, kining paghingpit na unya pag-legalize sa mga habal-habal nga bisa’g asa lang moagi, as if sila ang tag-iya sa kadalanan, makapasamot kini sa suliran sa trapiko, ug makadugang sa kasaba ug inconvenience sa ubang mga motorista.

Sa kanhiang mga panahon ang mga tartanilya giisip nga hari sa kadalanan; karon ang mga habal-habal na maoy king of the road. Mao na ba kini ang pagpatuman na sa transportation modernization program sa atong kagamhanan?

Sa dili  madugay ang ubang kanasuran magpadagan o magpalupad na unya og mga flying taxi. Kita dinhi, motorcycle taxi, ang atong counterpart pag-modernize sa mga sakyanan sa kadalanan.

Ingon ba kita niini ka-iwit kon kalambuan ug modernization na ang hisgutan? Nganong lupig man kita sa paglambo sa silingan natong mga nasud sa Halayong Sidlakan?