Mga misteryo sa Covid-19
Unahon nato ang maayong balita gikan sa China: Nasaksihan ang labing dako nga pagtibugsok sa bag-ong mga kaso sa Covid-19 human sa 14 ka sunudsunod nga adlaw sa pagtidlom sa mga natakdan (392 na lang human sa kapin sa 2,000 matag adlaw sa nangaging mga semana).
Apan isunod dayon natong di maayong balita: Dungan nga nasaksihan ang labing dako nga pagsulbong sa gidaghanon sa bag-ong mga pasyente nga natakdan ug namatay sa Covid-19 sa gawas sa mainland China, labi na sa silingang mga nasud sa Japan ug South Korea.
* * *
Nakaangkon og lab-as nga mga sukaranan ang pasidaan sa World Health Organization (WHO) sa tinakdanay sa ubang mga nasud nga nasudlan na sa kagaw sa wa pa tak-opi sa China ang Wuhan:
• Nisulbong ang mga kaso sa South Korea og 165% (sobra sa na-doble) gikan sa 31 ngadto sa 82 sud lang sa usa ka adlaw; ug
• 621 nay natakdan sa 3,011 ka pasahero ug tripulante sa barkong gitanggong sa Yokohama nga nakuhaan og samples (21% ang infection rate) ug nadugangang og 11 ka bag-ong kaso sa mainland Japan.
* * *
Hapit tanang bag-ong kaso sa South Korea naglambigit sa 61 anyos nga babaye nga gisip-on apan nagdumili sa pagpatambal kay wa siya kabiyahe sa gawas sa nasud.
Nakatambong siya og upat ka misa sa Shincheonji Church of Jesus sa Daegu City sa wa pa kakuhai og swab samples nga nagpakita nga duna siyay Covid-19.
128 sa 166 ka sakop sa simbahan nga nakaduol niya ang gi-quarantine sa mga tambalanan, 90 nila nagpakita og mga timaan sa sakit.
* * *
Padayong gisubay diin gikan ang kagaw sa babaye. Kay gawas nga wa kabiyahe sa gawas sa Daegu wa sab makaduol sa mga pasyente nga unang natakdan.
Lain ning ebidensiya sa pahinumdom sa WHO nga daghan pa ang wa mahibaw-i bahin ining kagawa.
Maong ahat pa ang pagdeklarar og kadaogan sa China. Samtang may mga timaan nga nabadlong na, may kahigayonan sab nga mobalik ra pagsulbong sa mga kaso. Sa sud o sa gawas sa China.
Maong inay mokumpiyansa, angayng magpadayon sa pagmatngon og pagpanlimpiyo—ang kinakusganong panagang di lang batok sa Covid-19 kon dili sa polio ug dengue sab.
* * *
- Latest
