Angay bang ihatag tanang kuwarta sa asawa?

Sa katigulangan, ang praktis nga gisunod sa magtiayon bahin sa paghupot og kuwarta mao ang paghatag sa tanang kita sa bana ngadto sa asawa. Ug ang asawa na maoy bahala mogahin og budget sa tanang galastohan sa balay apil na ang panginahanglan sa bana.

Pagahikit-an pa nako hangtod karon kadtong buhaton ni anhing Tatay Andot kada Sabado sa gabii inig uli niya sa among lungsod sa Balamban gikan sa sinemanang trabaho sa konstruksiyon ning dakbayan, diin iintrigo gyod niya tanang suweldo ngadto ni Nanay Totang.

Mura'g hiwaon akong kasingkasing nga makadungog ni Tatay inig tunol niya sa kuwarta: “Ako nang gikuhaag pamilite ug bayad ning dagkong pan sa Tinong’s Bakery, Yad. Ayawat na lang, mangalipay atong mga anak.” (Yad ang sangpit ni Tatay kang Nanay. Binali sa pulong ‘Day.’)

 Bisag gamay rag suweldo si Tatay, malipayon gihapon akong Nanay nga modawat-hipos sa kita ni Tatay. Molahos dayon siya sa kabankaban nga hinimo ra pong Tatay, ukban kini ug didto itago ang kuwarta nga giputos gyod intawog hinigtang panyo. Daw dili gustong mahilabtan.

Maayo motipig og kuwarta si Nanay. Maayo moabag sa kahago ni Tatay. Nanindag coconut candies, mani, asin, ginamos ug bisan unsa na lang nga kapanginabuhian. Hala, kayod taman sa ginhawa. Pero pobre gihapon mi, uy! Pobre nga malipayon. Kay kontento na man mi sa gihatag sa Ginoo.

Tungod sa pagkamaayong mogunit og kuwarta ni Nanay, nakapahuman gyod sila nakog paeskuyla sa hayiskol ug usa ka semester sa kolehiyo. Ug sa misunod nga semesters ako nay nagsariling-sikap hangtod nakakuha kog diploma.

Akong kauban sa trabaho, ang bana maoy migunit sa tanang suweldo nilang magtiayon. Kay iyang misis, bisag unsa kadaghan sa kuwarta ang itunol, dali rang mahurot.

Unya, walay investment nga makita. Maayo gani kay nakit-an nila ang maong buslot ug ang bana nay mihupot sa ilang kita. Resulta? May house and lot na sila, brand new car ug may tinigom pa!

Kining gipangladlad kong panag-ingnan, igo nang makatubag kon angay bang ihatag ang kuwarta sa asawa?  Or ngadto sa kapikas, kinsa may igong katakos sa paghupot sa kuwarta aron kini padaghanon?

Please think and choose the best!