Daghang nangahadlok

Ang mga tawo nga nagpuyo sa Sitio Grotto, sakop sa Barangay Apas, Dakbayan sa Sugbo gipangulbaan tungod kay ang building nga gitukod sa militar diha sa maong dapit maoy gihimong holding center sa mga tawo nga gikan sa kanasuran nga apektado sa novel coronavirus.

Nabalaka sila kay ang ilang kabalayan anaa nagpalibot sa maong building nga gipatukod kaniadto sa AFP Central Command.

Nahukman nga anha sa maong building temporaryong paestahon kadtong mga tawo nga mangabot gikan sa China ug ubang nasud nga may coronavirus.

Tan-aw nako, dili man angay’ng mabalaka ang mga lumolupyo sa maong dapit kay ang mga tawo nga gidala diha, gipanid-an pa lang kon wa ba sila matakboyi sa makamatay’ng sakit. Unsa man diay ang inyong gusto, papaulion ra dayon sila sa ilang tagsatagsa ka panimalay?

Dunay mga nagbagulbol ug nanawag gani og mga sakop sa media aron mabadlong ang mga opisyal sa kagamhanan kay nganong dad-on man kuno sila sa holding centers nga wala man sila makasinati og mga timailhan sa coronavirus.

Pasabton mo nako nga basta maglambigit na gani sa kakuyaw sa panglawas sa katawhan, may gahum gyud ang gobiyerno nga panalipdan ang kadaghanan.

Kon tugotan ra gud sa kagamhanan nga diretso lang nga mopauli sa ilang kabalayan ang mga gikan sa China, Taiwan ug ubang kanasuran nga may Corona virus, hayan nga mokuyanap ang maong sakit.

Human sa 14 ka adlaw nga pag-obserbar niadtong mga tawo nga gikan sa China ug ubang duol nga kanasuran, unya wala gyu’d sila’y tilimad-on sa coronavirus, mahimo na sila nga makapauli sa ilang panimalay.

* * *

Ang mga opisyal sa kapolisan dinhi sa rehiyon nagpirmahay og panaad nga dili gyud sila modawat og payola gikan sa mga tigpasiugda og mga ilegal nga sugal. Pagkanindot paminawon kon tininuod kining ila.

Awhagon nako ang bag-ong regional director sa kapolisan sa Central Visayas nga si Brigadier General Albert Ignatius Ferro nga pahimoon nimo og makanunayong operation ang imong mga sakop batok sa illegal swertres ug ubang ilegal nga sugal.

Bi, panid-an nato kon dili ba kutob ra sa pasiatab kining ilang gihimo nga pagpirmahay kunohay og panaad.

Wala malilong sa katawhan nga mikatap pag-ayo ang illegal swertres sa Dakbayan sa Sugbo ug lainlaing mga dapit sa probinsya.

Unya, may mi-text nako nga didto kuno sa lungsod sa Madridejos sa isla sa Bantayan, mikatap sab ang mga tigbakay nga ang nagdumala giingon nga igsoon sa usa ka opisyal sa lungsod. Kaila ba mo kon kinsa ang maong tawo?

Higayon na nga pamatud-an ninyo nga sensiro mo sa inyong mga panaad ug dili kay kutob ra sa pirma.