Divorce law

Usa sa mga init nga isyu nga gilantogian karon sa atong mga magbabalaod kon angay ba nga aprobahan ang gisugyot nga “Divorce Bill” dinhi sa Pilipinas. Dunay mipabor nga mugnaon kining mao nga balaod, apan may misupak sab.

Ang tinuod, bisan og wala pay Divorce law ang Pilipinas, apan dugay na nga gitugot sa atong balaod nga ang mga magtiayon nga wala na gyud magkasabot mahimo na silang magbuwag.

Dugay na kining mao nga balaod sa Pilipinas nga nagtugot sa panagbuwag sa managtiayon. Gitawag kini og Family Code of the Philippines nga gimugna niadtong 1987. Dihang gipatuman na kini, sus, nagtipun-og dayon ang mga petition for annulment sa mga hukmanan.

Dihang nadestino pa ko kaniadto sa Palace of Justice isip court reporter, naghimo ko og investigative reports kon unsa kadaghana ang mga magtiayon nga mihukom nga magbuwag gamit ang New Family Code.

Tuod, nasayran nako nga kaliboan ka petisyon ang gisang-at sa hukmanan. Kini maoy nakapahukom sa Korte Suprema nga magtudlo og Family Court nga ang iyang husayon mao ra gyud ang mga kaso nga naglambigit og panagsungi sa pamilya.

Kadtong mga magtiayon nga makahukom nga magbuwag na lang kay tan-aw nila wala gyuy maayong kaugmaon ang ilang panag-uban, mahimong mosang-at og Petition for Annulment of Marriage ug Legal Separation.

Kon aprobahan sa korte ang annulment of marriage ang estado sa bana ug asawa, mahibalik sa ilang pagka ulitawo ug dalaga, ug sila makahimo na sa pagminyo pag-usab. Apan ang legal separation, nagpabilin nga valido ang ilang kaminyoon sa asawa ug bana, apan dili lang sila magtipon.

Sa ato pa, bisan og giaprobahan na sa korte ang ilang Petition for Legal Separation, dili gihapon sila makaminyo og lain, dili makapuyo-puyo ug lain, kay kon himoon kini nila, mahimo sila nga makasohan.

Dunay laing paagi sa panagbuwag. Kini pinaagi sa pagsang-at og awhag sa korte nga Null and Void ang kasal. Ang elemento niini mao nga atol sa pagkasal, menor de edad ang usa sa contracting parties, sa ato pa ubos sa 18-anyos.

Ang laing basehanan sa pagdeklarar nga invalido ang kasal sa babaye og lalaki mao nga ang nagkasal kanila wala hatagi og pagtugot sa pagkasal. Ang mga mayor gihatagan og katungod nga makakasal, apan anha ra sa ilang teritoryo.

Ang pagpakasal sa mga paryente ra wala usab itugot sa balaod, apan kinahanglan kini nga ipaabot gyud sa korte. Sa ato pa, kon walay moreklamo magpabilin nga legal ang kasal.

Sa laktud, ang gisugyot nga divorce law dinhi sa nasud, dili na unta kinahanglan kay mosamot nga mabarato ang kasagrado sa kaminyoon.