EDITORYAL - Kabalaka kun mawala ang VFA

May mga nanggawas nga pagduhaduha ug kabalaka ang pipila ka opisyales sa gobiyerno niining planong pagbasura na sa Visiting Forces Agreement tali sa Pilipinas ug sa Amerika tungod kay may koneksyon kini sa seguridad sa nasud.

Ang kabalaka may kalabotan sa kasamtangang benepisyong nakuha sa Armed Forces of the Philippines gikan sa mga Amerikano pinaagi sa VFA ug sa Enhance Defense Cooperation Agreement (EDCA).

Samtang tuod namahayag si Defense Secretary Delfin Lorenzana, nga isip independente ug demokratikong nasud mahimong unilateral o ang Pilipinas ra maoy mobasura sa VFA ug di na kinahanglang may pagtugot sa US.

Apan siya miangkon sa mga tigbalita sa usa ka interbyu didto sa Zamboanga nga mawala gyud ang suporta sa US ilabi na sa intelligence, surveillance ug reconnaissance nga diin menus ang kapabilidad sa AFP.

Ang maong suporta nakab-ot pinaagi sa EDCA mao nga daghan ang nabalakang kun wala nay VFA nga maoy gibasihan sab sa EDCA maapektahan sab ang lokal nga mga operasyon sa AFP.

Wala gyud angkuna ni Duterte sa publiko ang dakong papel sa US sa kalamposan sa gubat kontra terorismo sa AFP didto sa Mindanao ilabi na batok sa ISIS.

Nakatabang sila sa Marawi siege, ug uban pang malampusong mga misyon sa AFP pagpangita ug pag-neutralize sa mga bag-ong misulbong nga lider sa IS didto sa Mindanao.

Ang AFP Modernization uwahi na kaayong nakabuylo ug kini nahitabo panahon na ni kanhi presidente Benigno “Noynoy” Aquino dihang giamendahan ang 15 ka tuig ra untang modernisasyon kay napupos nalang ang maong tagal wala makabaton og ‘credible’ nga mga gamit ang AFP.

Sa pagkakaron, kuwang pa kaayo ang kapabilidad sa AFP labaw na gikinahanglan ang maong kasabotan nunot sa hulga sa China.

Maayo lang unta kun kining gihimo ni Duterte usa lang ka taktika aron makakuha og mas daghang pabor gikan sa US ug dili tungod lang gyud sa pagkanselar sa maong nasud sa visa sa iyang suod nga higalang si Senador Ronald dela Rosa.