Hadlok sa NCOV, pero wa mahadlok magpakasala

Pagpangalisbo sa gikahadlokang 2019 Novel Coronavirus (nCoV), diin dali rang mikatap ang balita nga daghan nang nagkatinakday ug nangamatay didto sa Wuhan, China, mikurog ang tibuok kalibotan sa kalisang.

Naglumba pagpinalitayg surgical/facemasks ang katawhan kay nahadlok nga mahimong biktima sa wala pay tukmang tambal ning naasoyng virus, diin ultimong usa ka doktor nga puwerting paningkamot nga makasalbar og kinabuhi, nasudlan hinuon og corona virus, gisip-on, giubo, gihilantan ug namatay.

Nagsul-ob bayag protective mask ang maong doktor. Ugaling lang, sa iyang pag-atiman sa pasyente wala siya mag-goggle. Hinungdan, nga didto agi sa iyang abiyertong mga mata ang killer nga kagaw, diin gilupig ang iyang kabatid sa pagpakig-away batok sa gahom sa virus.

Ug nakabsan gyod siya sa kinabuhi. Nga maoy nakapasamot paghatag og dugang kakuyaw sa nagkalainlaing nasyonalidad, kinsa tataw kaayong hadlok mamatay. Dinhi lang sa ato, nag-facemask panic buying ang mga tawo. Bisag mikalit lag kamahal ang presyo, hala palit! Basta may ikatabon lang sa nawong. Ultimong surgical mask nga hinimo sa papel, gidaginot.

Maayo gani kay abtik ang atong Joint Cebu City Inspection Team, kinsa sa ilang pagpahigayon og inspeksiyon sa mga pharmacy ug tindahan sa downtown sa miaging Pebrero 6, nasakpan nilang may lima ka stall sa dalan Leon Kilat nga namaligyag paper surgical mask, nga dili gyod safe and healthy gamiton. Suwerte, kay igo rang giwarningan ang mga mapahimuslanon sa taga inspection team ug ang paper facemasks ray gisakmit. Ambot, nganong taliwala ning pagpanguhit sa atong Ginoo, diin gipaagi lamang Niya og nCoV, daghan gihapong makasasala ang wala makasabot sa Iyang tumong.

Nagpaila ba kini nga hangtod ning panahon nga hinayhinay nang nangguho ang signs of time sama sa lunop, linog, pagbuto sa bolkang Taal ug novel coronavirus, ang tawo nagpabiling wala makakita sa espirituhanong mensahe nga gustong ipadayag sa Diyos? Hugaw na kaayo ang kalibotan. Nagkadaghan na ang wala moilag Ginoo, ang naglunang sa kasal-anan. Busa, Iya tang gikablit aron mahigmata.

Gihatagan ta Niyag chance sa pagbag-o samtang may panahon pa. Apan makalibog. Hadlok ang katawhan sa nCov kay makamatay sa lawas. Pero wala mahadlok sa padayong pagpakasala nga tataw kaayong makalaglag sa kalag.