Nindot nga paagi

Sagad sa mga upper floors sa mga public market building, wala gyud kapahimusli sa kagamhanan tungod kay walay ganahan nga moabang. Ang rason mao nga maalkanse sila kay walay mamalit didto sa taas.

Ang Unit 3 sa Carbon Public Market dunay second floor, apan wala gyud kaayo kini kapahimusli. Gihimo ra kini nga bodega sa mga naninda sa Carbon.

Ingon usab niini ang sitwasyon sa Taboan ug T. Padilla markets, ug bisan na sa Lahug public market.

Dugay na kaayo nga gitan-aw nako kining mao nga isyu ug naghunahuna ko pagpangita og maayong pamaagi. Sa akong programa sa radyo DYLA, giimbitar nako ang chairman sa CEMVEDCO.

Si Erwin Gok-ong nga maoy labaw’ng opisyal sa Cebu Market Vendors Cooperative mihatag og ideya nga mahimong kapahimuslan ang ikaduha, ug bisan na ang ikatulong andana sa mga public market.

Pananglit, ang ikaduhang andana maoy patindahan sa mga namaligya og pagkaon, apan kinahanglan nga wala gyuy tugotan nga makapaninda og pagkaon sa silong.

Sa ato pa, kadtong gustong mokaon, mapugos gyud sila pagsaka sa second floor. Husto baya kaayo ang ideya ni Erwin Gok-ong ug kon ako pa ang mayor, himoon nako ni.

* * *            

Ang laing problema diha sa Carbon nganong dunay uban nga dili ganahan nga anha mangompra, mao ang kasamok ug ang kakuyaw nga mabiktima ka sa mga badlongon sa katilingban.

Kabahin sa kasamok diha sa Carbon district, gikan sa Magallanes Street paingon na sa Carbon Market, ang in-charge sa pagpanglimpyo sa mga aseras mao ang Market Operations Division.

Sa ato pa, kon ang mga aseras hugaw gani kay gihimo lang ni nga tam-okanan sa mga lantay nga gigamit sa negosyo sa pipila ka tawo, ang angay’ng basolon mao si Atty. Junil Matugina kay siya man ang hepe sa Office of the City Markets.

Pero tan-aw nako, tungod sa katalawan sa pipila ka sakop ni Matugina, dili sila makapatuman sa balaod ug pag-implementar og hawan nga Carbon public market.

Unsaon, kon hulgaon sila mahadlok na man. Iya kining gibutang sa social media nga gitabangan kuno’g kulata ang iyang sakop nga mibadlong sa mga tag-iya sa daghang lantay nga gibutang diha sa mga aseras.

Gikan niadto, ang iyang mga sakop mahadlok na kuno mamadlong kay basin og sila na usab ang makulatahan. Pastilan, kon kining batasana ang magdaghan, dili gyud kita makaangkon og kahapsay sa Carbon.

Bahin sa pagsumpo sa mga badlongon, gitug-anan ko ni Erwin Gok-ong nga midestino sila og mga tawo nga motabang aron mabadlong ang mgamangunguot ug mga snatchers.