Bata pa hambog na

Gipamulta sa Land Transportation Office (LTO) si Judiel Niño Cane, ang 18-anyos nga tinun-an kinsa nag viral sa social media tungod sa pag gamit og wangwang sa iyang pribado nga sakyanan kay nagdali kay nauwahi na kuno sa iyang eksaminasyon.

Si Cane nakalapas sa Presidential Decree Numero 96 nga gitawag og unlawful use or attachment of sirens, bells, horns, whistle or similar gadgets that emit exceptionally loud or startling sounds including domelights and other signaling or flashing devices on motor vehicles and providing certain exceptions therefore.

Si Cane mitahan sa iyang kaugalingon human siya gipangita sa taga-LTO tungod sa pag viral niya sa social media kay nag gamit og wangwang bisan pribado ang iyang sakyanan. Si Cane gipamulta og P8,000 tungod sa nahimo niyang kalapasan sa Presidential Decree 96.

Gawas sa multa, gisakmit usab sa LTO ang ekipo nga wangwang nga gitaud ni Cane sa iyang sakyanan, ang iyang lisensiya ug rehistro sa sakyanan. Giisyuhan usab siya og Temporary Operators Permit o TOP.

Bata pa gani, hambogero na si Cane. Kinsa man kaha ang iyang gisaligan sa iyang pagka hambogero?

Ang batanon nga Cane aduna nay laraw nga molapas sa balaud nga nagdili sa pag gamit og wangwang. Kini tungod kay ang iyang sakyanan pribado o dili kini iya sa gobyerno.

Sigun sa balaud ang bombero, police ug ambulansiya lamang ang gitugotan nga makagamit og wangwang tungod sa matang sa ilang trabaho. Pero dili pod sa tanang panahon nila magamit ang wang-wang.

Buot ipasabot, panahon lamang sa emerhensiya poyde nilang magamit ang wang-wang.

Dili bastabasta nga mogamit og wang-wang ang batan-ong si Cane kon wala pa kini gisaligan nga sa tanaw niya gamhanan. Dili kaha ang amahan sa iyang kauban sa sakyanan maoy iyang gisaligan?