EDITORYAL - Sumunod sa ipinag-uutos
Kahapon, nagpakita ng pagiging aktibo ang Bulkang Taal.
May nakitang manipis na usok na nagmumula sa bunganga nito. Ito ang unang pagkakataon na muling nakita ang usok mula nang pumutok noong Enero 12. Una nang sinabi ng Phivolcs na ang mga nararamdamang pagyanig sa paligid ng Taal ay senyales na may umaakyat na magma at posibleng magkaroon muli ng mga pagsabog.
Dahil dito, lalong nagpatupad ng paghihigpit ang Philippine National Police (PNP) sa mga residenteng nagnanais bumalik sa kanilang mga tahanan. Walang pinapayagan at sinisigurong wala nang tao sa lugar na sakop ng 14-kilometer danger zone sa paligid ng bulkan. Ayon sa National Disaster Risk Reduction and Management Council (NDRRMC) 12 bayan at 2 siyudad ang kabilang sa danger zone.
Sabi ng PNP, mapipilitan silang bitbitin ang mga residente na ayaw umalis. Magpapatupad sila ng total lockdown sa mga lugar na tinukoy ng NDRRMC. Wala umano silang magagawa kundi ipatupad ang kautusan upang maiwasan ang panganib ng bulkan. Mula nang pumutok ang Taal, mahigit 235,000 katao na ang inilikas mula sa lugar. Nasa iba’t ibang evacuation centers sila sa Batangas at Laguna. Bumabaha ang tulong na pagkain at inumin para sa kanila.
Sa kabila na mahigpit ang utos na umalis sa lugar, marami pa rin ang ayaw lisananin ang kanilang tirahan. Marami rin namang bumabalik sapagkat para sa kanila, hindi na raw puputok ang bulkan. Tahimik na raw ito kaya dapat na silang bumalik sa kanilang mga bahay para mabantayan. Marami na raw bahay ang nanakawan.
May pinuno naman na tila ginagatungan ang mga residente na bumalik sa kanilang mga bahay dahil tahimik na ang bulkan. Mas kilala raw ng mga tagaroon ang bulkan kaysa sa sinasabi ng Phivolcs. Matagal na raw sila sa Taal kaya mas kabisado nila ang aktibidad nito.
Inilalagay ng pinuno sa peligro ang buhay ng mga tao. Huwag gatungan ang mga tao sapagkat maaaring dumagsa ang mga residente pabalik sa kani-kanilang mga bahay. Paano kung sa pagbalik ay sumabog ang bulkan at marami ang mamatay. Walang ibang sisisihin kundi ang gobyerno. Huwag pairalin ang katigasan ng ulo. Sumunod sa utos.
- Latest
