Presidente misaad, kinsa ta nga mobalibad?

Dili ikalimod ang dako nga problema sa traffic dili lang sa Dakbayan sa Sugbo kondili sa tibook Metro Cebu area o posible gani sa tibuok lalawigan sa Sugbo sa madugay ug sa madali.

Kini kun walay himoon ang kagamhanan ilabi na ang mga hingtungdan nga local government units apan tungod kay limitado ang mga resources ug gahum dili ingon niana ka sayon ang agian aron mapatuman ang solusyon sa suliran sa trapiko.

Sa wala damha miabot ang maayong balita nga mismo gikan sa labing gamhanan nga tawo sa nasod walay lain si Presidente Duterte atol sa iyang pagtambong sa Sinulog  grand showdown sa Cebu City Sports Center. Wala kini pangayoa sa mga lokal nga opisyal kon dili siya mismo ang mitanyag sa solusyon kay nakita niya kun unsa ka dako ang problema nga gisagubang ug sagubangon pa sa mga Sugboanon. Gusto sa presidente nga dili masinati sa Sugbo ang kalbaryo nga nasinati didto sa Metro Manila busa karon pa lang kinahanglan unhan na kini. Matud niya nga angayang sundon sa Cebu ang teknolohiya sa Manila sama sa Light Rail Transit(LRT), mga skyways tungod kay hagip-ot na kaayo ang kadalanan kon ipadayon pa ang Bus Rapid Transit o BRT. Apan negatibong ang panglantaw ni Konsehal Joy Augustus Young nga dili kini makasulbad sa problema sa traffic kay pakyas gani didto sa kaulohan. Wala pa gani nasuwayan gihukman nang daan sa konsehal, hinoon iya usab kanang panglantaw apan kun paundayonan nato kining kawalay paglaum nga panglantaw seguradong lamyon kita sa bul-og sa problema sa trapiko.

Angayan gani magpasalamat kay mismo si Presidente Duterte ang mitanyag og solusyon nga nagpasabot lang nga hayag pa sa siga sa adlaw ang katumanan basta kanunay lang manoktok ang atong mga lokal nga opisyal aron mapahinumduman sa iyang gisaad.

Mipasalig hinuon si Mayor Edgardo Labella nga siya ang kanunay maningil sa gisaad sa presidente inubanan pa gyud sa personal nga paghunghong ni Secretary Michael Dino ngadto sa pangulo siyaro og dili mapatuman.

Imposible man alang sa uban ang sistema angayan nga hatagan nato og chance nga mapatuman kay kon molampos kitang tanan man ang mabulahan. Ipadaplin lang una ang mga espekulasyon mahitungod sa giingong vested interest kondili tan-awon ang public interest o kun unsa ang makaayo sa tanan.

Angayan ganing pasalamatan ang presidente kay gihatagan niya og paglaum ang Sugbo, Ingrato ra sad kaayo ta kun ato pang kwestyonon ang nakitang solusyon sa pangulo.