Kalamboan

Husto kaayo si Presidente Duterte nga pagka karon dunay mga dapit nga lisud na kaayo ang pagpalapad sa mga karsada aron unta pagsulbad sa problema sa kahuot sa mga sakyanan.

Sa pagpamulong ni Presidente Duterte didto sa Cebu City Sports Center atol sa kalihokan sa Sinulog kaniadtong Domingo, iyang gipasabot nga ingon gyud niini ang sitwasyon sa mga karaang siyudad – gagmay ug dili lapad ang mga karsada.

Unsaon, ang mga government planners kaniadto wala makapanglantaw daan nga sa umaabot nga katuigan, modaghan pag-ayo ang mga sakyanan, ilabi na ang katawhan. Tungod sa mubo ra nila nga panglantaw, gagmay ra ang gihimo nila nga mga karsada.

Husto si Presidente Duterte nga karon, lisud na kaayo ang pagpalapad sa karsada, sama sa Colon Street ug uban pa nga mga karsada nga ania sa siyudad. Sama sa Governor Mariano Cuenco Avenue diha sa Barangay Apas lahus na ngadto sa Talamban, angay unta kini nga gilapad na daan.

Karon, pwerteng lisura na sa pagpalapad niining maong mga karsada kay mogasto na ang kagamhanan og binilyon ka pesos nga salapi aron bayran ang mga tag-iya sa yuta. Samtang ang kagamhanan may gahum sa pagpugos pagpalit sa yuta kon gamiton kini sa public purpose, apan kinahanglan usab nga hatagan og tukmang prisyo ang mga tag-iya.

Tungod sa maong problema, gibutyag ni Presidente Duterte nga mangita na lang siya og mga paagi, pinaagi usab sa pakiglambigit sa mga opisyal sa kagamhanan, nga makatukod og mga skyways, sama sa railway nga adto mag-agi sa ibabaw.

Ingon niini ang gihimo sa ubang mga dagkong siyudad. Sama sa pag-adto nako sa Thailand sa miaging tuig, gikan sa airport sa Bangkok paingon sa among hotel, dul-an sa usa ka oras nga paspas kaayong pagdagan sa among gisakyan nga van, wala gyuy hunonghunong.

Sa ubos sa gisubay namo nga skyway, makita nimo ang daghang mga sakyanan nga anaa ra sa ubos. Ang mga skyway, magsugat-sugat ug duna say anha moagi ilawom sa among gisubay nga karsada. Ingon niana ang angay’ng tukoron dinhi sa Sugbo.

Nakapanglantaw hinoon si Presidente Duterte nga adunay posibilidad nga mosalga na usab ang politika ug may mga politiko na usab nga mobabag sa katumanan sa maong mga proyekto.

Ang uban gud nga mga politiko mopugong gyud nga ang ilang mga kaatbang, makahimo og mga major infrastructure projects kay mahadlok sila nga mabentahaan sila unya panahon sa kampanya sa laing eleksiyon.

Mao nga kitang katawhan, suportahan nato ang mga opisyal nga adunay maayong tinguha alang sa atong kalamboan sa umaabot nga katuigan.