Sukod sa kaligdong

Giduwaan ba nilang Cebu City Mayor Edgardo Labella ug sa iyang igsuon nga si Elmer “Jojo” Labella ang mga Sugboanon?

Unsa pa bay wala nila itug-an nato mahitungod sa mga exclusive nga kontratang gisudlan sa Sinulog Foundation Inc. alang sa Sinulog Festival karong adlawa?

Una, misulod ang SFI og exclusive contract sa MyTV alang sa katungod pagbroadcast sa Sinulog Grand Parade.

Ikaduha, mipirma og kontrata ang SFI uban sa San Miguel alang sa exclusive gihapon nga pagbaligya sa ilang mga produkto atol sa Sinulog.

Niining duha ka mga kontrata pulos nanghunaw ang mayor. Wala kuno siya masayod. Dali niyang gikanselar ang kontrata uban sa MyTV human daghan ang nireklamo. Apan ang kontrata uban sa San Miguel wala siya moklaro kanselahon ba o dili.

Igo rang miingon ang mayor nga dili binding ang maong kontrata sa dakbayan tungod kay wala silay labot niini ug nga mamahimo ra nga mobaligya ang ubang mga produkto atol sa Sinulog.  Apan dunay kundisyon ang mayor. Kinahanglan kuno mosunod sa tanang lagda sa dakbayan. Dinhi magsugod ang problema. Unsay dag-anan sa ubang mga produkto og ilang apikihon sa mga lagda aron paburan ang gikakontrata sa iyang igsuon? Kinsa may patuohon ni Mayor Labella nga wala siya pahibaw-a sa iyang igsuon sa mga kontrato niini?

Mao nay problema og ang mga membro sa pamilya sa usa ka opisyal mag-apil apil sa mga kalihukan.

Kun dunay delicadeza ang mayor angayang did-an niya ang mga miyembro sa iyang pamilya nga moapil sa mga kalihukan, labi pa og maglambigit og mga kontrata, nga dunay kalabutan ang dakbayan sa Sugbo.

Isip kanhi opisyal sa Ombudsman, nasayod ko nga nahibawo kaayo si Labella unsay ipasabot og conflict of interest.

Mentras wala pa hingpit mahanaw ang respito ug pag-ila sa publiko sa iyang kaligdong, maayong sukad karon hipuson sa mayor ang iyang mga paryente ug mga igsuon.

Ayaw sila tugoti nga mosalmot sa mga transaksiyon nga direkta ug bisan dili direkta nga maglambigit sa syudad.

Kana kun wala pa hingpit kaona ang iyang prinsipyo sa sistema ug kun duna pay uwaw nga nagpabilin niya. Dinhi atong masukod ang iyang kaligdong.